Read Paite Chin EKSODAS 29 Bible Online

EKSODAS 29 - Paite Chin bible

EKSODAS 29

¹Huan, siampu a pang a, ka na sem ding a na siansakna dia hiai ahi a tung ua na hih ding, bawngtal nou khat leh belampa nih gensiatbei na la ding ahi.

²Huaiban ah tanghou silngou sohlouh, tanghou beu silngou sohlouh thau a zut leh tanghou pek silngou sohlouh thau a zut, huitbuh tangbuang in na bawl ding ahi.

³Huaite lawh sung ah na koih dia, bawngtal leh belampa nihte toh, lawh in n’on tawi ding hi.

⁴Kihoupihna puanin kongkhak ah Aron leh a tapate n’on pi dia, tui in amau na sil ding ahi.

⁵Huaikhit in siampu puansilhte na la dia, puanaktung leh siampu puanaktual leh siampupuan leh awmtuam Aron na silh sak dia, siamtak a kigan puanduang kawnggak in amah na gak ding ahi.

⁶A lu tung ah lukhu na koih dia, lukhu tung ah lallukhu siangthou na koih ding ahi.

⁷Thau nilh chi na la dia, a lu tung ah na buak dia amah na nuh ding ahi.

⁸A tapate n’on pi dia puanaktungte na silhsak ding ahi.

⁹Kawnggak in amau na gak dia, Aron leh a tapate, lukhu bem na khu sak ding hi. Omden ding thuseh ading in siampu nasep amau a ahi ding. Hichibang in Aron leh a tapate na hihsiangthou ding ahi.

¹⁰Kihoupihna puanin ma ah bawngtal na kaisak dia; Aron leh a tapate’n bawngtal lu tung ah a khutte uh a nga ding uhi.

¹¹Kihoupihna puanin kongkhak kiang ah, TOUPA ma ah bawngtal na gou ding ahi.

¹²Bawngtal sisan na la dia, na khutzung in maitam kite na nuh dia, sisan tengteng maitam bul sik ah na sungkhe ding ahi.

¹³A sunglam tuam a thau tengteng na la dia, a sin tung a a lam om leh, a kaileng nihte, leh a tung ua a thau maitam tung ah na hal ding hi.

¹⁴Bawngtal sa leh, a vun leh a ek, giahphual pawlam ah mei in na hal ding hi. Hiai khelhna thillat ahi.

¹⁵Belampa khat na la dia, belampa lu tung ah Aron leh a tapate’n a khut uh a nga ding uhi.

¹⁶Belampa na that dia, a sisan na la dia, maitam kimvel in na theh ding hi.

¹⁷Belampa na semnen dia, a sunglam na sawp dia, a khete leh a sate leh a lu na koihkhawm ding hi.

¹⁸Belampa avek in maitam tung ah na haltum ding ahi. Hiai TOUPA adia mei a thillat gimnamtui ahi.

¹⁹Belampa dang na la dia; belampa lu tung ah Aron leh a tapate’n a khut uh a koih ding uhi.

²⁰Belampa na gou dia, Aron bil taklam dawn leh a tapate bil taklam dawn ah leh a khut taklam khutpi uah, a khe taklam khepi uah, a sisan na la dia, na nuh ding a, maitam kimvel ah huai sisan na theh ding ahi.

²¹Maitam tung a om sisan na la ding a, nuhtheih thau toh, Aron tung ah leh a puan tung ah leh a tapate tung ah leh a kiang a a tapate puan tung ah na theh ding. Huchi in amah leh a puante leh tapate leh a tapate puante hihsiangthou ahi ding hi.

²²Huai Belampa thaute, a mei thau, asung thau, a sin leh a kailing nihte leh a thaute, a taklam phei toh na la ding ahi. Hiai bel siangthou a sehtuamna belampa a hih ziak ahi.

²³TOUPA mai a lawhbeu a om silngou sohlouh tanghou kikoihte lak a tanghou beu khat, sathau a kikang tanghou pei khat leh tanghou kan pek khat na la dia,

²⁴Aron khut leh a tapate khut ah na koih dia; huaite TOUPA ma ah vei thillat in na vei ding hi.

²⁵Amau khut apan huaite na sang dia, haltum thillat ding in maitam tung ah na hal ding ahi, TOUPA ma a gimlim hi ding in. Hiai TOUPA adia mei a thillat ahi.

²⁶Aron hih siangthouna belampa awm na la dia, TOUPA ma ah vei thillat in na vei ding hi. Hiai nang tan ding ahi.

²⁷Huai siangthou a sehtuamna belampa apan veithillat a veisa a awm leh vei thillat a veisa a phei, Aron tan leh a tapate tante na hihsiangthou ding hi.

²⁸Hiai Israel suante apan a Aron leh a tapate tan ngeina ahi gige ding ahi. Huai bel Israel suante’n a lemna thillatte ua pan TOUPA adia a piak ding uh ahi.

²⁹Aron puansilh siangthoute amah nung in a tapate a ahi ding uhi; Amaute a hih siangthou ding leh sehkip ding in.

³⁰Amah mun a siampu honghi a tapa in Mun Siangthou a nasem dia Kihoupihna puanin sung a a lut chiang in, ni sagih sung huai puansilhte a silh ding ahi.

³¹Kihih siangthouna belampa na la dia, Mun Siangthou ah a sa na tuihuan ding ahi.

³²Aron leh a tapate’n belampa sa leh lohsung a om Kihoupihna puanin kongkhak kiang ah tanghou a ne ding uhi.

³³Amau sehkipna ding leh hih siangthouna dia a khelhna thoihna thilte a nekding uh ahi. Thilzek leh siangthou a hih ziak in midang kuamah in a nek louh ding uh ahi.

³⁴Kihihsiangthouna sa hiam tanghou hiam a zingsang tan a om leh mei in na hal ding ahi. A sianthou ziak in na ne ding ahi kei hi.

³⁵Huchibang a thu k’on piak bangbang in Aron kiang ah leh a tapate kiang ah na hihdia, ni sagih sung amau na hihsiangthou ding ahi.

³⁶Lemna thillat ding in niteng in bawngtal khat khelhna thillat ding in na lan ding ahi. Hiai adia lemna na bawlzoh chiang in, maitam na hihsiang dia, thau na nilh dia, na siangthousak ding ahi.

³⁷Ni sagih sung maitam ading in lemna na bawl dia; na hihsiangthou dia; maitam siangthou pen ahi ding. Huai maitam khoih peuhmah a sianthou ngeingei ding ahi.

³⁸Niteng a maitam tung ah kum khat a upa belamnou nih na lat gige ding ahi.

³⁹Belamnou khat zingsang in na lan dia; belamnou khat dang nitaklam in na lan ding ahi.

⁴⁰Belamnou khat na lat chiang in tangbuang seh sawm suah, seh khat, a thau toh hin khat a seh lina toh dawn thillat ding in uain hin khat a seh lina na lan ding ahi.

⁴¹Belamnou khat dang pen nitaklam in na lan dia, tangbuang thillat dungzui in, leh dawn thillat dungzui in gimlim ding in, na hihdia, TOUPA adia mei a thillat gimnamtui ahi.

⁴²Na khang na khang un hiai TOUPA ma a Kihoupihna puanin kongkhak a haltum thillat ahi nilouh ding ahi. Huai ah na kiang ua thugen ding in k’on kituahpih ding hi.

⁴³Huai ah Israel suante ka kituahpih dia, ka thupina in biakbuk a hih siangthou ding hi.

⁴⁴Kihoupihna puanin leh maitam ka hihsiangthou dia; siampu a pang a kei adia nasem ding in Aron leh a tapate leng ka hihsiangthou tuaktuak ding hi.

⁴⁵Huchi in Israel suante lak ah ka teng dia, a Pathian uh ka hi ding.

⁴⁶TOUPA a Pathian uh, a lak ua ka ten theihna dia amaute Aigupta gam apan pikhepa ka hi, chih a thei ding uhi. TOUPA a Pathian uh ka hi.