Read Paite Chin EKSODAS 30 Bible Online

EKSODAS 30 - Paite Chin bible

EKSODAS 30

¹Gimlim halna ding maitam na bawl ding ahi. Singgi sing in na bawl ding ahi.

²A saulam tong khat ahi dia; a zatlam tong khat mah. A saulam leh a zatlam a kikim dia, a sanlam tong nih ahi ding ahi. A kite leng a kibang in sa khat ahi ding uhi.

³Dangkaeng tak in naluan dia; a tung, a sikte leh a kite ah a kimvel in dangkaeng in a geivel na bawlding hi.

⁴Dangkaeng sikkual nih a pang nih ading na bawl dia, maitam pang nihte ah na bulh dia, a zawnna zawlte khumna ding ahi ding uhi.

⁵Singgi sing in a zawnna ding chiangte na bawl dia, dangkaeng in huaite na luan ding ahi.

⁶K’on kituahpihna ding mun, theihsakna tung a om chitna tutphah ma, theihpihna bawm kiang a om puanzak ma ah na koih ding ahi.

⁷Zingsang teng in huai tung ah Aron in gimlim a haldia; khawnvakte a det chiang in, a tung ah gimlim a hal ding ahi.

⁸Nitaklam a Aron in khawnvakte a det chiang in, a tung ah gimlim a hal ding. Na khang na khang un TOUPA ma a gimlim ahi tawntung ding hi.

⁹Huai ah theihlouh gimlim hiam haltum thillat hiam, tangbuang thillat hiam, na lan ding uh ahi kei. Huailou in huai ah dawn thillat leng na sung ding uh ahi kei hi.

¹⁰Kum khat in khatvei Aron in khelhna thillat sisan a kite ah a tat dia, lemna a bawl ding ahi. Na khang na khang un kum khat in khatvei a tung ah lemna a bawl ding ahi. Hiai TOUPA adia siangthou pen ahi.

¹¹Huaikhit in TOUPA’N Mosi kiang ah thu a gen:

¹²A zah uh theihna dia kisimpina na bawl chiang in, pasal chih in a kha tatna sum TOUPA kiang a a piak ding ahi. Hiai ahihleh amaute na sim chiang a a lak ua hipi a len louhna ding ahi.

¹³Simtel a om michih in tatna sum a piak ding ahi. Mun siangthou sum sekel kimkhat ahi ding ahi. Sekel khat gerah sawmnih a gik ahi.

¹⁴Simtel a omte lak a paisuak peuhmah kum sawmnih a upa leh a tunglam in TOUPA kiang a thillat a lat ding uh ahi.

¹⁵Na kha ua ding a lemna bawlna dia, TOUPA kiang a thillat a piak chiang un, a haute leh a zawngte’n sekel kimkhat sang a tam zaw leh tawm zaw a piak louh ding uh ahi.

¹⁶Hiai bang in Israel suante lemna sum na la dia, Kihoupihna puanin a nasepna ding in na sep ding ahi. Na kha uh tatna ding a, TOUPA ma a Israel suante adia theihgigena a hih theihna ding in.

¹⁷TOUPA’N Mosi kiang ah thu a gen hi:

¹⁸Kisilna ding in tuikuang dal in na bawl dia, a tunna khete leng dal in na bawl ding ahi. Kihoupihna puanin leh maitam kikal ah na koih dia, huai ah tui na koih ding ahi.

¹⁹Aron leh a tapate’n a khutte uh leh a khete uh tui in a sil ding uh ahi.

²⁰Kihoupihna puanin sung a, a lut ding chiang uhiam, nasem dia TOUPA mai a, mei a thillat lan dia maitam a naih ding chiang ua, a kisil ding uh ahi. A kisil kei uh leh a si ding uhi.

²¹Huai bang a, a sih louhna ding ua a khutte uh leh a khete uh a sil ding uh ahi. Hiai tangtawn in amau ading in thuseh ahi dia; a khang a khang un amah ading leh a suante ading nangawn in ahi ding ahi, a chi hi.

²²TOUPA’N Mosi kiang ah thu a gen lai hi:

²³Gimlim leng kilak inla, murra tui sekel za nga leh singguithak gimlim huaizah kimkhat, sekel za nih leh sawmnga sialluang khum sekel za nih leh sawmnga,

²⁴Singguithak sekel za nga, Mun Siangthou sekel dungzui in, olive thau hin khat.

²⁵Nuhtheih siangthou in thau na bawl dia, nuhtheih damdawi misiamna bang a gawm; nilhtheih thau siangthou ahi ding.

²⁶Huai in Kihoupihna puanin na nuh ding, theihpihna bawm toh,

²⁷A dohkan leh a belsuan tengteng leh khawnvak koihna leh a belsuan chiteng leh gimlim maitam toh.

²⁸Haltum thillat maitam leh a belsuan tengteng leh, tuikuang leh a khe.

²⁹Huaite na hihsiangthou dia; a siangthou pen hi ding in. Bang peuh huaite khoih a sianthou ngeingei ding uh ahi.

³⁰Aron leh a tapate thau na nilh dia, amau na siangsak ding, siampu nasepna mun a kei adia na a septheihna ding un.

³¹Israel suante kiang ah thu na gen dia, na khang na khang un kei ading in hiai thaunilh siangthou ahi ding hi.

³²Mihing sa tung ah na buak ding uh ahi kei. A kihel khawm bang in a kibatpih dang himhim leng na bawl ding uh ahi kei. Hiai nilh siangthou ahi a, nou ading in a siangthou ding ahi.

³³Hiai bangbang a hel a, a kibatpih sathau bawl hiam, siampu hilou midang tung a zang hiam kuapeuh a mite lak apan ka satkhe ding, a chi, chi in.

³⁴Huai ban ah TOUPA’N Mosi kiang ah: Gimlimte, singnai, onicha, galbanum leh begaw a kikim chiat la in.

³⁵Hiaite apan gimnamtui na bawl ding ahi. Gimnamtui bawlsiamte hel bang na hel ding ahi. Chisoh, a siang leh a zek a siangthou ahi ding hi.

³⁶Khenkhat na gawi zan mahmah dia, Kihoupihna puanin sung a theihpihna ma ah na koih dia, huai ah k’on kimuhpih ding hi. Hiai nang ading in siangthou pen ahi ding hi.

³⁷Na bawl ding gimnamtui toh kisai in, a helkhawm dan a a batpih nou aituam ding in na kibawl ding a hi kei. Nou ading in TOUPA mai ah thil siangthou ahi ding ahi.

³⁸A gimnamtui napdia a batpih bawl peuhmah a mite apan ka satkhe ding, a chi hi.