Read Paite Chin EKSODAS 32 Bible Online

EKSODAS 32 - Paite Chin bible

EKSODAS 32

¹Tang apan Mosi a hong paisuk pahlouh mite’n a theih un, mite Aron kiang ah a hong kikhawm ua, a kiang ah, “Kisa in, ka ma ua pai ding, pathiante hon bawlsak in. Hiai Mosi, Aigupta gam apan hon pikhepa lah, bang chita ahia, ka thei ngalkei ua,” a chi uhi.

²Aron in a kiang uah, “Na zite uh bil a om, natapate uh bil a om, na tanute uh bil a om, dangkaeng bilbahte tolkhia unla, ka kiang ah hontawi un,” a chi hi.

³Mi tengteng in a bil ua dangkaeng bilbahte a tolkhia ua, Aron kiang ah a hontawi uhi.

⁴Aman a khut ua pan huaite a la a, sunthoh bawngnou lim a bawl a, huai bang in dangkaeng bawngnou lim in asung hi. Huaikhit in amau, “Israel aw, Aigupta gam apan nang hon pikhia na pathian hiai ahi,” a kichi uhi.

⁵Aron in huai a muhtak in, a ma uah maitam a bawl a, Aron in thuphuan a nei a, Zingchiang TOUPA adia Ankuangluina ahi, a chi hi.

⁶A zing in beltak in a thou ua, haltum thillat a lan ua, lemna thillat a tawi uhi. Mite ne ding leh dawn ding in a tu ua, noptal ding in ading uhi.

⁷TOUPA’N Mosi kiang ah, “Kumsuk in, na mi Aigupta gam apan na pi khiakte, a kihihsiat ziak un.

⁸Amau ka lampi hilh apan a pialpah man hial uhi. Bawngnou lim sun a kibawl ua, huai a bia ua, a mai ah thillatte a lan ua, ‘Israel aw, hiai na pathian, Aigupta gam apan hon pikhetu ahi,’ a chi uhi,” a chi hi.

⁹TOUPA’N Mosi kiang ah, “Hiai mite ka muta a, ngai in, mi genhakte ahi uhi.

¹⁰Huaiziak in tuin a tung uah ka thangpaihna a kuangzak a, amaute ka kattum theihna ding in hon khahzan in. Huchi in nam thupi in k’on bawl ding” a chi hi.

¹¹Mosi in TOUPA a Pathian a ngen a, “TOUPA, thilhihtheihna thupi leh ban thahat a Aigupta gam apan na pikhiaksa, na mite tung ah bangdia na thangpaihna kuangzak ding ahia?

¹²Bangding in ahia Aiguptate’n thu gen a, ‘Hihse dia amau pikhia eive, tangte a amau that ding leh, lei tengteng apan amaute kangtum ding in?’ Na thangpaihna thupi lakik inla, na mite tung a hiai thil hoihlou na ngaihtuah kikhelsak in.

¹³A kiang ua, ‘Van a aksite bang in na suante ka pungsak dia, na suante kiang a thu ka gensa, hiai gam tengteng ka honpe ding, huchi in tangtawn in na luah ding uh,’ chi a, nangmah ngei a na kichiamna, na sikhate, Abraham, Isak leh Jakob theigige in” a chi hi.

¹⁴Huchi in a mite tung a thil hoihlou hihdia a ngaihtuah TOUPA’N a kikhel sakta hi.

¹⁵Mosi a kihei a, tang apan a paisukta. A khut ah theihpihna suangpek nihte a om hi. Suang pekte a lang nihtuak a gelh ahi a, khatlam leh lang khatlam a gelh ahi uhi.

¹⁶Suangpekte Pathian thilhih ahi a, a gelhte leng Pathian gelh ahi, suangpekte tung a gelhte.

¹⁷Joshua in mite kikou husa a zak in Mosi kiang ah, “Giahphual ah kidouna husa a om” a chi hi.

¹⁸Aman, “Tungnun kituh a kikoute aw ahi kei a, nuaisiah a om ziak a kapte aw leng ahi kei. Lasate husa ahizaw ka zak,” a chi hi.

¹⁹Hichi ahi a, giahphual kiang a hong tuntakin, bawngnou leh lam a muta hi. Huchi in Mosi hehna a sou a, a khut apan suangpekte a pai a, tangnuai ah a keksakta hi.

²⁰A bawngnou bawl uh a la a, mei ah a khul a, a gawinen a, tui tung ah a theh a, Israel suante a dawnsak hi.

²¹Mosi in Aron kiang ah, “Hiai mite’n bang ahia na kiang a a hih uh, a tung ua hichitel a khelhna thupi na tunsak?” a chi hi.

²²Aron in, “Ka toupa mite na thei hi, thilsia a zon dan uh na hehna kuang kei hen.

²³Ka ma ua pai ding, pathiante hon bawlsak in. Hiai Mosi Aigupta gam apan hon pikhetoupa lah, bang suakta ahia ka thei ngalkei ua, ka kiang a a chih ziak un;

²⁴Ken a kiang uah, Dangkaeng nei peuh in, hon tolkhia un, ka chi hi. Huchi in amau kei a honpia ua; ken mei sung ah ka khia a, hiai bawngnou lim a hong pawtkhia” a chi hi.

²⁵Aron in a utut ua om dia mite a taizak uh phal in, melmate ma ah zahlak in a omsak, chih Mosi in a mu hi.

²⁶Giahphual kongpi ah Mosi ading a, “TOUPA lam a pang kuakua ahia? Ka kiang ah hongpai hen” a chi hi. A kiang ah Levi ta tengteng a kikhawm khawmta uhi.

²⁷Aman a kiang uah, “Israel TOUPA Pathian in hichi’n a chi. Michih in a pang ah a namsau kuah henla, giahphual tuansuak in kongpi khat apan kongpi dang ah lut in pawt henla, michih in a sanggampa, michih in a lawmpa, michih in invengte that hen” a chi hi.

²⁸Levi tate’n Mosi thu dungzui in a hihta ua; huchi in huai ni’n mite lak ah mi sang thum a si uhi.

²⁹Mosi in, “Michih in a tapa, michih in a unaupa douta na hih man un, a hon vualzawl theihna ding in tuni in TOUPA ading in kihihsiangthou un” a chi hi.

³⁰A zing in hichi ahi a, Mosi in mite kiang ah, “Khelhna thupi in na khialta uhi. Tuin TOUPA kiang ah ka hohtou dia; na khelhna uh ading in lemna ka bawlthei maithei hi” a chi hi.

³¹Mosi TOUPA kiang ah a kiknawn a, “Aw, hiai mite’n khelhna thupitak a hihta uhi, dangkaeng pathiante a kibawlta uhi.

³²Ahi a lah, tuin, a khelhna uh ngaidam in-; Na ngaihdam kei ding leh, na gelhsa na laibu apan kei hon thaimang in, ka hon ngen” a chi hi.

³³TOUPA’N Mosi kiang ah, “Kuapeuh ka tung a khial, ka laibu apan ka thaimang ding.

³⁴Huaiziak in tuin kuan inla, na kiang a ka genna mun ah mite pi in. Ngai in, na ma ah ka Angel a pai ding. Akoi abang hileh gawt dia ka veh ni’n a khelhna uh ziak in amau ka gawt ding” a chi hi.

³⁵Huchi in Aron in a bawl bawngnou mai a thil a lat ziak inTOUPA’N mite hipi in a gawtta hi.