Read Paite Chin EKSODAS 33 Bible Online

EKSODAS 33 - Paite Chin bible

EKSODAS 33

¹Huaikhit in, TOUPA’N Mosi kiang ah, “Kuan inla, hiai apan paitou in, nang leh Aigupta gam apan na pikhiak mite, Na suante kiang ah k’on pe ding, chi a, Abraham, Isak leh Jakob kiang a ka kichiamna gam ah.

²Na ma ah ka Angel ka sawl dia; huchi in Kanante, Amorte, Hitte, Perizte, Hivte leh Jebuste ka hawlkhe ding.

³Bawngnawi leh khuaizu a luang gam ah hohtou un. Mi genhakte na hih ziak un, kei na lak ua hohtou lou ding ka hi. Huchilou in zaw lampi ah k’on kangtum kha ding” a chi hi.

⁴Mite’n hiai thu hoihlou a zak un, a lungkham uhi. Huchi in mi kuamah kizepna a kizem a omkei uhi.

⁵TOUPA’N lah Mosi kiang ah, “Israel suante kiang ah, Mi genhakte na hi uhi. Mitphiat kallou a na lak ua hongtou a, hong kangtum thei ka hi. Huaiziak in na tung ua bang hih ding ka hia, chih ka theihna ding in na kizepnate uh suah un” chi’n, a na genkhinta hi.

⁶Huchi in Israel suante’n Horeb tang ah a kizepnate uh a suahkhe vek uhi.

⁷Mosi in puanin a sut a, giahphual pawlam, giahphual apan gamlapi ah a kai a, Kihoupihna puanin, a chi hi. Hichi ahi a, michih TOUPA zongte Kihoupihna puanin, giahphual pawlam a om ah a hoh uhi.

⁸Hichi ahi a, puanin lam a Mosi a paikhiak teng in, mite avek un ading ua, michih a puanin kongkhak bul ah ading ua; puanin a a lut mateng Mosi a enzui uhi.

⁹Hichi ahi a, Mosi puanina a lut leh, meipi khuam a hong kuma, puanin kongkhak bul ah ading a, TOUPA’N Mosi a houpihta hi.

¹⁰Mi tengteng in puanin kongkhak bul ading, meipi khuam a mu uhi. Mi tengteng ading ua a bia uhi, michih in a puanin kongkhak chiat ah.

¹¹Mi’n a lawm a houpih bang in, TOUPA’N kimaituah in Mosi a houpih hi. Huchi in giahphual ah a kiknawn a, himahleh a sikha Joshua, Nun tapa, tangval, puanin apan a paikhe kei hi.

¹²Mosi in TOUPA kiang ah, “En in, hiai mite hon pitou in n’on chi a, himahleh ka kiang a kua honsawl ding na hia chih n’on theisak kei. Hinapi inlah, Na min in k’on thei a, Ka mitmuh in hehpihna leng na mu hi, na chi hi.

¹³huaiziak in tuin, ka hon ngen ahi. Na mitmuh a hehpihna ka muh leh, nang k’on theihna ding leh na mitmuh a hehpihna ka muh theihna ding in, tuin na lampi hon ensak in. Hiai nam na mite ahi, chih ngaihtuah in” a chi hi.

¹⁴Aman, “Ka ompihna nang toh a ton dia, khawlna k’on pe ding” a chi hi.

¹⁵Aman a kiang ah, “Na ompihna kei toh a tonkei ding leh, hiai apan hon pitou ken.

¹⁶N’on tonpih kei leh, bangchi’n na mite leh ken na mitmuh in deihsakna ka mu uh chih kithei ding ahia? Leitung pumpi a teng mi tengteng apan kei leh na mite a tuam ka hi uh, chih bang in a kichiansak dia?” a chi hi.

¹⁷TOUPA’N Mosi kiang ah, “Ka mitmuh in deihsakna na mu a, na min in k’on theita a, hiai na nget pen leng k’on hihsak ding” a chi hi.

¹⁸Aman, “Ka hon ngen hi, na thupina hon ensak in” a chi hi.

¹⁹Aman, “Na ma ah ka hoihna tengteng ka paisak dia, na ma ah TOUPA min ka tangkoupih ding. ‘Ka hehpih nopmi, ka hehpih dia, chitna ka etsak nopmi, chitna ka en sak ding,’ a chi hi.

²⁰Himahleh ka mai na mu theikei ding. Mi, kei honmu, hing kuamah a omlouh ziak in.

²¹TOUPA’N, ‘En in, hiai ah ka kiang ah mun khat a om a; suangpi tung ah a na ding in.

²²Huchi in hichi ahi ding, Ka thupina in honkhen sung in suangpi heng ah k’on koih dia, ka honkhen sung in ka khut in ka honkhuh ding hi.

²³Huaikhit chiang in ka khut ka lakhe dia, huchi in ka nunglam na mu dia; himahleh ka mai bel a kimu kei ding’ ” a chi hi.