Read Paite Chin EKSODAS 34 Bible Online

EKSODAS 34 - Paite Chin bible

EKSODAS 34

¹Huan, TOUPA’N Mosi kiang ah, “Amasa bang in suangpek nih bawl inla; hiai suangpekte tung ah, na hihsiat suangpek masapente a om thute ka gelh ding.

²Zingsang in mansa in om inla, zingsang in Sinai tang ah hongtou inla, tangvum ah ka kiang ah hong kihil in.

³Na kiang a kuamah a hong touhlouh ding uh ahi. Tang kimvel a leng kuamah himhim muh a, a omlouh ding uh ahi. Tang mazawn lam a bawnghon leh belamhon leng a gamtat louh ding uh ahi” a chi hi.

⁴Huchi in suangpek nih a bawl a, a masapen bang in. Zingkhang in Mosi a thou a, TOUPA’Nthu a piak bang in, Sinai tang ah a hohtou hi, a khut in suangpek nihte a tawi hi.

⁵TOUPA meipi ah a hongkum a, a kiang ah a hong dingta a, TOUPA min a genkheta hi.

⁶Huchi in a ma ah TOUPA a paisuak a, TOUPA TOUPA Pathian, hehpihthei leh itthei, dohthei leh, hoihna leh thutak hau.

⁷Sangte adia chitna nei, gitlouhna, tatlekna leh khelhna ngaidam, mawhna bangchi mah a siang saklou ding, pate gitlouhna tate tung leh a tusuante tung ah, a khang thumna leh a khang lina tan a thuk” chi in a phuang khia hi.

⁸Kintak in Mosi leisi in a kunsuk a, a beta hi.

⁹Aman, “Tu a na mitmuh a hehpihna ka muh leh, TOUPA aw, k’on ngen hi, Ka lak uah ka TOUPA pai hen; mi genhak a hih ziak un. Ka gitlouhna uleh ka khelhna uh ngaidam inla, na gouluah ding in honla in” a chi hi.

¹⁰Aman: Ngai in, nou toh thukhun ka bawl hi. Lei tengteng a hih a om ngeilou, koi nam a leng hih a om ngeilou, thillamdangte na mi tengteng ma ah ka hih ding hi. A lak ua na tenna mi tengteng in Toupa’n nou adia thil lauhuai ka hih dingte a mu ding uhi.

¹¹Nang tuni a k’on thupiak zui in. Ngai in na ma uah Amorte leh Kanante leh Hitte leh Perizte leh Hivte leh Jebuste ka hawlkhe ding hi.

¹²Na paina gam a tengte toh thukhun na bawlkha ding uhi, kiveng un. Huchilou in zaw na lak ua thang ahi ding uhi.

¹³A maitamte uh hihsia un, a milimte uh hih gawpsak un, a Aserah songte uh na phuksak ding uh ahi.

¹⁴Pathian dang na be ding uh a hi kei: TOUPA, a min mullithat ahi, mullithat Pathian ahi.

¹⁵Huai gam a tengmite toh kikal ah thukhun na bawlkha ding uhi. A pathiante uh kiang ah kithoihna a lat chiang in khattei in a honchial dia, a kithoihnasa na nekha ding uhi.

¹⁶Na tapate ading in a tanute uh na pisak khading ua, a tanute uh a pathiante uh kiang a a kizuak chiang un, na tapate uh leng amaute hih bang a, a milim pathiante uh be ding in a khempuk kha ding uhi.

¹⁷Sunthoh pathiante na kibawl ding uh ahi kei hi.

¹⁸Tanghou silngou sohlouh Ankuangluina na nei gige ding uh ahi. Thu k’on piaktak bang in, Abib kha in, ni sagih sung tanghou silngou sohlouh na ne ding uhi. Abib kha a Aigupta apan a na hong paikhiak ziak un.

¹⁹Sul hong tamasa tengteng, na ganhon lak ua piang masapen teng, bawngtal hi in belam hileh, a pa peuhpeuh kei a ahi.

²⁰Himahleh sabiltung nou masapen belamnou in na tan ding uh ahi. Na tat kei uleh, a ngawng na hektan ding uh ahi. Na tapate tengteng lak a piang masapen na tan ding ahi. Ka ma ah kuamah khutvuak in a hong kilang ding uh ahi kei.

²¹Ni guk sung nna nasem ding ahi. Himahleh a ni sagih ni’n na khawl ding ahi. Haichi pawi hun leh pawltak hun in na khawl ding ahi.

²²Nipi kalte a Ankuangluina, huitbuh pawltak gahmasa Ankuangluina, kumtawp a koihkhawmna ankuangluinate na tan ding ahi.

²³Kum khat in thumvei pasal tengteng TOUPA Pathian, Israel Pathian ma ah a kilat ding uh ahi.

²⁴Na mai ua namte ka delhkhe dia, na gamgi uh ka keklian ding. Kum khat a thumvei TOUPA na Pathian ma a na kilat chiang un, kuamah in na gam uh a hon deihgoh kei ding hi.

²⁵Ka mai a kithoihna thillat; sisan silngou toh na lan ding uh ahi kei. Paikan Ankuanglui kithoihna leng a zingchiang tan in nutsiat in a om ding ahi kei.

²⁶Na gam a gah masapente a masapen TOUPA na Pathian inn ah n’on tawi ding ahi. Kelnou a nu nawitui in na huan ding ahi kei, a chi hi.

²⁷TOUPA’N Mosi kiang ah, Hiai thute gelh in. Hiai thute omdan zui a nang leh Israel toh thukhun ka bawltak ziak in, a chi hi.

²⁸TOUPA kiang ah ni sawmli leh zan sawmli a om a; an a nekei a, tui leng a dawnkei hi. Suangpek tung ah thukhun thute, huai Thupiak Sawmte a gelh hi.

²⁹Sinai tang a kipan a khut a theihpihna suangpek nihte tawia, tang apan Mosi a hong paisuk lai in, amah a houpih sung in a maitang a tang, chih Mosi in a theikei hi.

³⁰Aron leh Israel suan tengteng in Mosi a muhtak un, ngai in, a maitang a tang a; amah naih a hongpai a lauta uhi.

³¹Himahleh Mosi in amau a sam a; Aron leh mipi kikhawmte heutu tengteng a kiang ah a hong kiknawn ua; Mosi in amau a houpih hi.

³²Huai nung in Israel suan tengteng a hongpai nai ua; Sinai tang a a kiang a TOUPA’N a gen tengteng thupiak in amau a peta hi.

³³Mosi in amau a houpih khitin, a maitang khuhna in a khuh hi.

³⁴Himahleh TOUPA houpih dia a mai a lutteng in, a hongpawt khiak nawn mateng, a mai khuhna a hawkkhia a; thupiak a omte Israel suante kiang a a gen chiang in.

³⁵Israel suante’n Mosi maitang a mu ua, Mosi maivun a tang hi. Mosi in Toupa houpih dia a lut nawn matan in a maitang a khuh zel hi.