Read Paite Chin EKSODAS 35 Bible Online

EKSODAS 35 - Paite Chin bible

EKSODAS 35

¹Huan, Mosi in Israel suan tengteng a khawmkhawm a, a kiang uah: Hiaite na hih ding ua TOUPA thupiakte ahi.

²Ni guk sung in nna sepzoh ahi dia, himahleh a ni sagih ni nou adia siangthou ahi ding hi. TOUPA adia Sabbath khawlna ahi. Sabbath ni a nou adia in omni: Hiai ni nna sem peuhmah thah ding ahi.

³Sabbath ni’n na omna peuh uah mei na chih ding uh ahi kei, a chi hi.

⁴Israel suan kikhawmkhawm tengteng kiang ah Mosi in thu a gen a: TOUPA’N noute a hon thupiak hiaite ahi uhi.

⁵TOUPA ading in na lak uah thilpiakte lakhawm un. Lungtang a utna nei kuapeuh in Toupa ading in thilpiakte: dangkaeng, dangka leh dal;

⁶khau dum, khau sandup, khau sanau, puanmalngat hoih, kel mul;

⁷belampa mul diahsan, ngalvang vun, singgi sing;

⁸khawnvak ading thau, thaunilh ding in gimlim; hal namtui ding;

⁹Onik suangte, siampu puanak leh awmtuam a siat ding suangmantamte hon tawikhawm uhen.

¹⁰Na lak ua khutsiam tengteng na hongpai ding ua, TOUPA bawl ding chi a thu a honpiak tengteng a bawl ding uhi.

¹¹Biakbuk, a puanin, a khuhna, a sikkawi, a singpekte, a sik tawnte, a khuamte leh a kingakna khuak kuakte;

¹²a bawm leh a chiangte, chitna tutphah leh a khuhna puanzak;

¹³Dohkan leh a chiangte, a tuium-belsuan leh tanghou koihna;

¹⁴khawnvak ading in khawnvak koihna leng, a vante, a khawnvakte, a vakna thau;

¹⁵gimlim maitam leh a chiangte, nilhtheih thau, gimlim leh biakbuk lutna kongkhak a dia puankhai.

¹⁶Haltum thillatna maitam, a dal vutluah, a chiangte leh a tuium-belsuan tengteng, tuikuang leh a khe;

¹⁷a huangsung puankhaite, a khuamte, a kingakna khuak kuakte, huangsung kongkhak a dia puankhai;

¹⁸Biakbuk kilhna zumte, huangsung kilhna zumte leh a khaute;

¹⁹nasepna puante, Mun Siangthou a nasepna dia siampu Aron puan siangthoute, a tapate puante bawl uhen, a chi hi.

²⁰Huchi in Israel suan kikhawmteng Mosi omna apan a paita uhi.

²¹Michih a lungtang tohthoh a om peuhmah leh michih utna nei peuhmahte a hongpai ua, Kihoupihna puanin lamna ding leh asung a nasepna ding leh puansilh siangthoute bawlna ding TOUPA ma ah thilpiak a hontawi uhi.

²²Lungtang a utna nei pasalte leh numeite a hongpai ua, dangkaeng a kibawl thil tuamtuam: bilbah, nakbah, zungbuh, awhthoh leh butthoh kizepnate, a hontawi ua, Toupa mai ah a lan uhi.

²³Khau dum, khau sandup, khau sanau, puanmalngat hoih, kel mul, belampa vun, ngalvang vun neite’n huaite a hontawi uhi.

²⁴Thilpiak dia dangka leh dal neite’n TOUPA mai a thillat ding in a hontawi uhi. Singgi sing neiteng in leng a hontawi uhi.

²⁵Numei khutsiam tengteng khut in khau a khek ua, a kheksa uh a hontawi ua, khau dum, khau sandup, khau sanau leh puanmalngat hoih a hontawi uhi.

²⁶Lungtang tohthoh numei tengteng in kelmul a khek uhi.

²⁷Vaihawm mite’n onik suangte, suangte, siampu puan leh, awmtuam a siat dingte a hontawi uhi;

²⁸gimnamtui halding singgah namtui leh detding meivak leh nilh ding sathau a zat ding leh gimnamtui a hel ding sathau a hontawi uhi.

²⁹TOUPA’N Mosi tawn a thu a piak a, van bawl ding a chih tengteng bawlna ding in Israel suante, numei leh pasal te’n amau utthu in thilpiakte TOUPA mai ah a hontawi uhi.

³⁰Mosi in Israel suante kiang ah: En un, TOUPA’N Bezaleel, Uri tapa, Hur tapa, Judah nam a mi a min in a sam a;

³¹Pathian Kha leh theihsiamna leh theihna leh khutsiamna chi teng in amah a luahdim sak hi.

³²Huai bel khutsiam tak a bawl dingte gelsiamna, dangkaeng leh dangka leh dal thilbawlsiamna ahi a, bulh ding suangmantamte atsiamna, singlam siamna ahi.

³³bulh ding suangmantamte atsiamna, singlam siamna leh khutsiam thilbawl chi teng a siamna ahi.

³⁴Hiai ban ah amah leh Dan nam a Ahisamak tapa Aholiab leng midangte sinsak siamna a pia hi.

³⁵Amau teng khuakthoh a thilbawl siamna chikim leh khau dum, khau sandup, khau sanau, puanmalngat hoih gat zep siamna, gat siamna, ze tuamtuam gelh siamna nei ding in pilna a pia hi.