Read Paite Chin EKSODAS 36 Bible Online

EKSODAS 36 - Paite Chin bible

EKSODAS 36

¹Hiai bang in Bezaleel, Aholiab leh Mun Siangthou vanzatte bawl ding dan thei ding a Toupa’n pilna leh theihsiamna a piak khutsiamte’n TOUPA thupiak bang in vanzatte a bawl ding uh ahi, a chi hi.

²Huaikhit in Mosi in Bezaleel, Aholiab leh michih khutsiamna nei, a lungtang ua TOUPA’N pilna a koih leh michih a lungtang ua nasem a kuan dia tohthoh a omte Mosi in a samta hi.

³Amaute’n Mun Siangthou bawlna dia Israel suante’n a hontawi uh thilpiak tengteng Mosi apan a lata uhi. Huchi in zingsang teng in utthu a piak thillatte a kiang ah a hontawi uhi.

⁴Mun siangthou a nna tengteng sem, khutsiam teng a nasep chiat apan a hongpai ua,

⁵Mosi kiang ah, “TOUPA’N bawl dia a hon thupiak bang a nasepna dia hunzah sang a tamzaw mite’n a hon tawita uh” a chi uhi.

⁶Mosi in thu a pia a, giahphual teng ah a tangkoupih ua, pasal hileh numei hileh Mun Siangthou bawlna dia thilpiak kuamah in penawn kei un, a chi hi. Huchi in, thilpiak hontawi nawnlou dia kham in a omta uhi.

⁷Mun siangthou bawlna a nna tengteng sepna ding in a van neihsa uh kiching in, a tam lawta hi.

⁸Nasemte lak a khutsiamte’n biakbuk khuhna ding siamtak a khui cherubte lim tuanna puanzak sawm, khau dum, khau sandup leh khau sanau khuk in a bawl uhi.

⁹Puanzak khat dunglam tong sawmnih leh giat ahi a; a vailam tong li; puanzak tengteng letdan a kikim chiat hi.

¹⁰Puanzak ngate kithuah in a khep uhi. Puanzak dang ngate leng a khep uhi.

¹¹A kithuahna mong khepna apan puanzak khat gei ah khau dum in bilte a bawl ua, huchi mah in a nihna khepna ah, puanzak dang gei chin ah bilte a bawl uhi.

¹²Puanzak khat ah a bil sawmnga a bawl ua, a nihna kikhepna a puanzak gei ah a bil sawmnga a bawl uhi. A bilte kizawn geihgeih in a om uhi.

¹³Dangkaeng in kilhna sawmnga a bawl ua, kilhnate in puanzakte a gawm khawm hi. Huchi in biakbuk khat a hong hita hi.

¹⁴Puanin biakbuk tung ading in kelmul in puanzak a bawl ua; sawmlehkhat a bawl uhi.

¹⁵Puanzak khat dunglam tong sawmthum ahi a, puanzak khat vailam tong li ahi. Puanzak sawmlehkhatte a lehlam a kibang vek hi.

¹⁶Puanzak ngate amau in a kikhep tuam a, puanzak gukte amau in a kikhep tuam hi.

¹⁷A kikhepna a puanzak mong chin ah a bil sawmnga a bawl ua, puanzak a nihna thuahna pen mong ah a bil sawmnga a bawl uhi

¹⁸Khat a hih theihna dia puanin kaihkhawmna ding in dal in kilhna sawmnga a bawl uhi.

¹⁹Puanin khuhna ding in belampa vun diahsan in a bawl ua, huai tung ah ngalvang vun in khuhna a bawl uhi.

²⁰Singgi sing in biakbuk singpek ding a bawl ua, a tunthoh in.

²¹Singpek saulam tong sawm ahi a, singpek zatlam tong khat leh a kim ahi.

²²Singpek khat in atgek nih a nei a, a kigamlat dan uh kikim in huchibang in biakbuk singpek tengteng ading in a bawl uhi.

²³Biakbuk ading in singpek a bawl ua, simlam sang ah simlam pang ading in singpek sawmnih a bawl uhi.

²⁴Singpek sawmnih nuai ah dangkaeng in kingakna khuakkuak sawmli a bawl ua; a atgek nihte ading in singpek khat dang ah kingakna khuakkuak nih, a atgek nih ading in singpek dang ah kingakna khuakkuak nih a bawl uhi.

²⁵Biakbuk pang khatlam ading in, a mallam ning a om ading in singpek sawmnih a bawl uhi.

²⁶A Dangkaeng kingakna khuakkuak sawmlite toh; singpek khat dang ah kingakna khuakkuak nih, singpek dang khat ah kingakna khuakkuak nih a bawl uhi.

²⁷Tumlam biakbuk pang a te ading in singpek nih a bawl uhi.

²⁸A pang nihte ah biakbuk ningte ading in singpek nih a bawl uhi.

²⁹A nuai ah a kithuah ua, a tung ah, sikkual khat ah a kikaikhawm ua; huchibang in a ning tuak ah a hih tuaktuak uhi.

³⁰Singpek giat a om a; a kingakna khuakkuak uh dangka a bawl kingakna khuakkuak sawmlehguk ahi ua, singpek chih dang ah kingakna khuakkuak nih a bawl uhi.

³¹Singgi sing chiangtawn a bawl ua, biakbuk pang khat a singpekte ading in nga a bawl uhi.

³²Biakbuk pang dang a singpekte ading in chiangtawn nga a bawl ua, tumlam pang a biakbuk singpekte ading in chiangtawn nga a bawl uhi.

³³Chiangtawn laita pen singpekte khat apan a dang kap paisuak in a bawl uhi.

³⁴Singpekte dangkaeng in a luan ua, a dangkaeng sikkualte uh chiangtawn omna ding in a bawl ua, chiangtawnte dangkaeng in a luan uhi.

³⁵Khau dum, khau sandup, khau sanau leh puanmalngat koptah hoih in puankhai a bawl ua; khutsiamtakin cherubte a bawl uhi.

³⁶Singgi sing in khuam li a bawl ua; dangkaeng in a luan ua, a bannate dangkaeng a bawl ahi. Huaite ading in dangka in kingakna khuakkuak li asung uhi.

³⁷Biakbuk kongkhak a ding in khau dum in, khau sandup in, khau sanau in leh puanmalngat hoih koptah, phim a khui in puankhai a bawl uhi.

³⁸A khuam ngate a banna utoh; a zingte uleh a puanduangte dangkaeng in a luan ua: himahleh a kingakna khuakkuak ngate dal ahi.