Read Paite Chin EKSODAS 37 Bible Online

EKSODAS 37 - Paite Chin bible

EKSODAS 37

¹Huan, Bazaleel in singgi sing in bawm a bawl a, tong nih leh a kim a dunglam ahi a, tong khat leh a kim a vailam ahi, tong khat leh a kim a san lam ahi.

²Dangkaeng tak in a sunglam leh a pawlam a luan a, dangkaeng lallukhu a kimvel in a bawl hi.

³Dangkaeng sikkual li asung a, a ning lite a bulh ding in. A pang khat a sikkual nih, a pang khatlam ah sikkual nih.

⁴Singgi sing in chiang a bawl a, dangkaeng in a luan hi.

⁵Chiangte bawm pang a sikkual sung ah, bawm puakna ding in a thun lut hi.

⁶Dangkaeng tak in chitna tutphah a bawl a; tong nih leh a kim a dunglam ahi a, tong khat leh a kim a vailam ahi.

⁷Dangkaeng sekkhiat in chitna tutphah mong nihte tuak ah cherubte a bawl hi.

⁸Hiai lampang mong ah Cherub khat, huai lampang mong ah Cherub dang khat, chitna tutphah apan a mong langnihte ah cherubte a bawl hi.

⁹Cherubte’n tunglam ah a kha uh a zak ua, chitna tutphah tunglam ah, a mai uh kingattuah in, a kha un a khuh ua; chitna tutphah lam ah cherubte mai a om hi.

¹⁰Singgi sing in dohkan a bawl a; tong nih a dunglam ahi a, tong khat a vailam, tong khat leh a kim a sanlam ahi.

¹¹Dangkaeng tak in a luana, a kimvel in dangkaeng lallukhu a bawl hi.

¹²Huailou in huai ah a kimvel in khutpek chia in a gei a bawl a; a kimvel in a gei ding in dangkaeng lallukhu a bawl hi.

¹³Dangkaeng sikkual li asung a, a khe lite a om a ning lite tung ah sikkualte a bulh hi.

¹⁴A geichin ah, dohkan puakna ding chiangte ading in mun, sikkualte a om uhi.

¹⁵Singgi sing in chiangte a bawl a, dohkan puakna ding in, dangkaeng in a luan hi.

¹⁶Dohkan tung a om tuium-belsuan a bawl a, a kuangte leh a sikkeute leh a noubemte leh a khuhna ding singte, dangkaeng tak in a bawl hi.

¹⁷Khawnvak koihna dangkaeng tak in a bawl a; sekthoh in khawnvak koihna a bawl hi: a kungpi, a hiang, a noubemte leh a mumte leh a pakte kibang chiat uhi.

¹⁸A pangte apan hiang guk a kakhia a; khawnvak koihna hiang thum a pang khat apan, a pang dang apan khawnvak koihna hiang thum.

¹⁹Noubem thum makha gah bang a bawl hiang khat ah, a mum leh a pak; noubem thum makha gah bang a bawl hiang dang ah, a mum leh a pak, huchibang in hiang guk teng ah khawnvak koihna apan in.

²⁰Khawnvak koihna makha gah bang a bawl noubem li a om a; a mumte leh a pakte.

²¹A kibang in hiang nihte dang ah mum khat, a kibang in hiang nihte dang ah mum khat, a kibang in hiang nihte dang ah mum khat, hiang gukte bangzel in a kakhia uhi.

²²A mumte uh leh a hiangte uh kibang ahi ua: avek un dangkaeng tak sekthoh ahi.

²³Khawnvak sagihte, meihalnate leh meivukuangte dangkaengtakin a bawl hi.

²⁴Dangkaeng tak talent khat in tuium-belsuan teng a bawl hi.

²⁵Gimlim maitam singgi sing in a bawl a; a dunglam tong khat ahi, a vailam tong khat; kiptak a bawl ahi a; a sanlam tong nih ahi. A kibang vek uhi.

²⁶Dangkaeng tak in a luan a, a tung leh a kimvel in a pangte, a kite. Huailou leng a kimvel in dangkaeng lallukhu a bawl hi.

²⁷A lallukhu nuai ah dangkaeng in sikkual nih a bawl a, a ning nihte kiang ah, a sik nihte tung ah, a puakna ding chiangte omna ding in. Gimnamtui leh Thau Nuh ding Bawlna

²⁸Singgi sing in chiangte a bawl a, dangkaeng in a luan hi.

²⁹Nilh theih thau siangthou, gimlim namtui siangthou, damdawimi hih bang in, a bawl hi.