Read Paite Chin EKSODAS 38 Bible Online

EKSODAS 38 - Paite Chin bible

EKSODAS 38

¹Singgi sing in haltum thillat maitam a bawl a; a dung tong nga ahi a, a vai tong nga ahi a, a sanlam tong thum ahi. Kiptak a bawl ahi.

²A ning lite ah a ki a bawl a; a kite a kibang vek ua; dal in a luan hi.

³A tuium-belsuan tengteng, maitam, belte, vutluahte, salu kuangte, sa thuknate leh meibel tengteng dal in a bawl hi.

⁴A laizangtak nuai ah a mong dang ah dal hakvang maitam ading in a bawl hi.

⁵Chiangte omna ding in, dal hakvang mong lite ading in sikkual li asung hi.

⁶Singgi sing chiang a bawl a, dal in a luan hi.

⁷A puakna ding in, maitam pang a sikkualte sung ah chiangte a thun a; maitam singpek in asung a hawmsak hi.

⁸Dal in tuikuang leh a khe a bawl a, numei kikhawm, Kihoupihna puanin kongkhak a kikhawmte limlangte a bawl hi.

⁹Huangsung a bawl a; simlam pang simlam ah huangsung puankhai, puanmalngat hoih koptah, tong za khat a om hi.

¹⁰A khuamte sawmnih ahi ua, a dal kingakna khuakkuakte sawmnih; khuam bannate leh a dangka puanduangte uhi.

¹¹A mallam pang ading in puankhaite tong za khat ahi ua, a khuamte uh sawmnih leh, a dal kingakna khuakkuakte sawmnih; a khuamte a bannate leh dangka gaknate.

¹²A tumlam pang ading in tong sawmnga a sau puankhaite a om ua, a khuamte sawm leh a kingakna khuakkuak sawm; a khuamte a bannate leh a dangka gaknate uhi.

¹³A suahlam pang suahlam ading in tong sawmnga.

¹⁴Kongpi sik khat a puankhaite tong sawmlehnga ahi ua; a khuamte thum, a kingakna khuakkuakte thum mah.

¹⁵Hiai lam sang leh huai lam sang a, huangsung kongpi sik khatlam pang ading in puankhai tong sawmlehnga ahi ua; a khuamte thum, a kingakna khuakkuakte thum mah ahi.

¹⁶Huangsung a kimvel a puankhai tengteng puanmalngat koptah hoih ahi.

¹⁷Khuam a kingakna khuakkuakte dal ahi ua; khuam a bannate leh a dangka gaknate dangka a zingte uh luanna; huangsung khuam tengteng dangka in a gaknate a kibawl hi.

¹⁸Huangsung kongpi a puankhai phim a khui, khau dum, khau sandup, a sanau leh puanmalngat hoih koptah ahi. A dunglam tong sawmnih ahi a, a pek sanlam tong nga ahi, huangsung puankhaite toh a kituak hi.

¹⁹A khuamte li ahi a, a kingakna khuakkuakte li, dal a bawl. A bannate dangka a bawl, dangka a bawl a zingte leh a dung luante.

²⁰Biakbuk kilhnazum teng leh huangsung kimvel kilhna tengteng dal ahi uhi.

²¹Hiai biakbuk vankim, sim a om bang in, theihpihna biakbuk a te ngei, Levite nasepna dia, Mosi thupiak bangzel a siampu Aron tapa, Ithamar khut a bawl ahi uhi.

²²Huchi in Bezaleel, Uri tapa, Hur tapa, Judah nam a mi in TOUPA’N Mosi thu a piak tengteng a bawlta hi.

²³Amah toh sem, gelh nasep siam, khau dum leh khau sandup leh khau sanau leh puanmalngat a zebawl siam, Holiab, Ahisamak tapa, Dan nam a mi ahi.

²⁴Dangkaeng tengteng Mun Siangthou a nasepna teng a sepna dia zat, thillat dangkaeng nangawn, talent sawmnih leh kua leh, sekel, Mun Siangthou a sekel dungzui in, za sagih leh sawmthum ahi.

²⁵Dangka, khawmpi a simte talent za khat leh sekel sang khat leh za sagih leh sawmguk ahi, Mun Siangthou a sekel dungzui in.

²⁶Mi chih ading in beka khat, huai bel, sekel kimkhat ahi, Mun Siangthou a sekel dungzui in, michih sim a omte ading in, kum sawmnih a upa leh a tung lam, pasal nuai guk leh sang thum leh za nga leh sawmnga.

²⁷Dangka talent za khat Mun Siangthou a kingakna khuakkuak ading in asung ua, puanzak a kingakna khuakkuakte toh; talent za khat adia kingakna khuakkuak za khat, kingakna khuakkuak khat adia talent khat zel.

²⁸Sekel sang khat za sagih leh sawmsagih leh nga in khuam a bannate a bawl a, a zingte luan in a kimatsak hi.

²⁹Thillat dal talent sawmsagih leh, sekel sang nih leh za li ahi.

³⁰Huaite in Kihoupihna puanin kongkhak kingakna khuakkuak a bawl a, dal maitam leh dal hakvang a bawl, maitam tuium-belsuan tengteng toh.

³¹Huangsung kimvel a kingakna khuakkuak, huangsung kongpi kingakna khuakkuak, biakbuk kilhnazum tengteng leh, huangsung kimvel a kilhnazum tengteng a zou hi.