Read Paite Chin EKSODAS 39 Bible Online

EKSODAS 39 - Paite Chin bible

EKSODAS 39

¹Khau dum leh khau sandup leh Khau sanau kigan in Mun Siangthou a nasepna ding siampu puante a bawl ua, Aron puansilh siangthoute a bawl uhi. TOUPA’N Mosi thu a piak bang a bawl ahi.

²Khau dum, khau sandup, khau sanau leh puanmalngat hoih koptah dangkaeng in siampu puan a bawl uhi.

³Dangkaeng khau leh khau dum, khau sandup, khau sanau leh puanmalngat hoih a kigan in siampu puanakzem a bawl uhi.

⁴A nunglam leh malam kaihkhawmna ding, a liangzang ah kaihna a bawl ua, a tunglam gei tuak a khihkhawm hi.

⁵A tung a om, a siampu puanak siamnel tak a gat leng a kibang mah in a nasep dungzui in; dangkaeng, khau dum, khau sandup, khau sanau leh puanmalngat hoih a TOUPA’N Mosi thu a piak dungzui in gat in a bawl uhi.

⁶Onik suang a bawl ua, chiamtehna gelhna a gelh, dangkaeng bulhna a bulh in, Israel suante min bangzel in a bawl uhi.

⁷Huaite siampu puanak liangzang ah a koih ua, Israel suante dia theihgigena suangte hi ding in: TOUPA’N Mosi thu a piak bang in a bawl hi.

⁸Khutsiamtakin awmtuam a bawl a, siampu puanbawl bang in. Dangkaeng, khau dum leh khausan leh khau sandup leh, khau sanau leh puanmalngat hoih koptah in a bawl hi.

⁹A dung a vai a kikim a; awmtuamna thuah nih in a bawl uhi. A saulam khap khat ahi a, a vailam khap khat, thuah nih ahi.

¹⁰Huai ah suang vual li in a siat ua; a vual khatna sardi suang, topaz suang leh karbankul suang; hiai a vual khatna ahi.

¹¹A vual nihna, emerald suang, sapphir suang leh diamond ahi.

¹²A vual thumna, liguri suang, agate suang leh amethis suang ahi.

¹³A vual lina, beril suang, onik suang leh jasper suang ahi a; a phuhna uah dangkaeng bulhna a siatlut uhi.

¹⁴Suangte Israel suante min bangzel leh a hihna zah uh bangzel in, sawmlehnih, chiamtehna gelhnate bang in, michih a min toh nam sawmlehnihte gelh ahi.

¹⁵A mongte ah awmtuam tung ah khainiang, dangkaeng tak pakkhi a bawl uhi.

¹⁶Huchi in dangkaeng bulhna nih a bawl ua, dangkaeng sikkual nih toh: awmtuamna mong nihte ah sikkual nihte a koih uhi.

¹⁷Awmtuamna mongte a sikkual nihte sung ah dangkaeng khainiang nihte pak bang a bawl in a thun uhi.

¹⁸Pak khainiang nihte mong nihte suangmantam bulhna nihte ah a koih ua, a ma ah siampu puan liangzang thuahna ah a koih uhi.

¹⁹Dangkaeng in sikkual nih a bawl ua, awmtuamna mong nihte tung ah a koih ua, a gei ah, siampu puanak sunglam pang ah a om hi.

²⁰Dangkaeng sikkual nih dang a bawl ua, nuai lam ah siampu puanak mong nihte ah a koih uhi, a malam sang ah, a kikhepna zawntak ah, siampu puanak kawnggak kigatthoh tung ah a koih uhi.

²¹Gakna khau dum in siampu puanak sikkualte in awmtuam a gakden ua, siampu puanak apan a awmtuam a kiphel theihlouhna ding in; TOUPA’N Mosi thu a piak bang in a bawl uhi.

²²Siampu puanak puanaktual gat thoh, avek a dum a bawl hi.

²³Puanaktual laitak ah vanga om a, sikpuanak banbei vang bang in, a kek louhna ding a, a vang kimvel a kaihna khau a om hi.

²⁴Puanaktual mongte ah khau dum, khau sandup, khau sanau leh puanmalngat hoih in theibuhfai gahte a bawl uhi.

²⁵Dangkaeng tak in dak a bawl ua, dakte puanaktual mong a theibuhfai gahte kikal ah, theibuhfai gahte kikal zel ah a khaisuak uhi.

²⁶Dak leh theibuhfai gahte nasepna ding a puanaktual mong kimvel ah TOUPA’N Mosi thu a piak bang in a bawl uhi.

²⁷Aron leh a tate ading in puanmalngat puanak tung gat thoh a bawl uhi.

²⁸Puanmalngat hoih in lukhu leh puanmalngat hoih in lutuam leh puanmalngat hoih koptah in puan pheituam gek a bawl uhi.

²⁹Kawnggak puanmalngat hoih koptah, khau dum, khau sandup, khau sanau, khuithoh in a bawl ua: TOUPA’N Mosi thu a piak bang in a bawl uhi.

³⁰Dangkaeng tak in lallukhu siangthou a bawl ua, a tung ah laigelh, chiamtehna gelhnate bang in, SIANGTHOUNA TOUPA A AHI chih a gelh uhi.

³¹Huai ah khauhual dum a khih ua, lukhu tunglam gak toupek ding in; TOUPA’N Mosi thu a piak bang in a bawl uhi.

³²Hichibang in khawmpite puanin biakbuk nasep tengteng zoh ahita hi. TOUPA’N Mosi kiang a thupiak bang in Israel suante’n ahihta uhi.

³³Puanin leh puanbuk van tengteng, a kibatnate, a singpekte, a chiangte, a khuamte leh kingakna khuakkuakte Mosi kiang ah a hontawi uhi.

³⁴A khuhna belampa vun diahsan leh, a khuhna ngalvang vun leh, a khuhna puanzak;

³⁵Theihpihna bawm leh, a chiangte leh, chitna tutphah;

³⁶Dohkan leh, a tuium-belsuan tengteng leh Pathian Ompihna tanghou sawmlehnihte;

³⁷Khawnvak koihna, khawnvakte, leh a tuium-belsuan tengteng leh khawnvak adia sathau;

³⁸Dangkaeng maitam leh, nilhtheih sathau leh, gimlim leh, puanin kong ading a puankhai;

³⁹Dal maitam, a dal hakvang, a chiangte, leh a tuium-belsuan tengteng tuikuang leh a khe;

⁴⁰huangsung puankhaite, a khuamte leh, a kingakna khuakkuakte, leh huangsung kongpi puankhai, a khaute, a kilhnazumte, leh biakbuk nasepna tuium-belsuan tengteng, kihoupihna puanin ading:

⁴¹Mun Siangthou a nasepna ding nasepna puan, hoihtak a bawlte, siampu Aron ading puan siangthoute leh, a tapate puante, siampu nasepna mun a nasepna ding,

⁴²TOUPA’N Mosi thu a piak bang in, huchibang in Israel suante’n na tengteng a hih uhi.

⁴³Mosi in nasep tengteng a en a, ngai in TOUPA thupiak bangtak in a hihta uhi. Huchi in Mosi in huaite a vualzawl hi.