Read Paite Chin EKSODAS 40 Bible Online

EKSODAS 40 - Paite Chin bible

EKSODAS 40

¹Huan, TOUPA’N Mosi kiang ah thu a gen a:

²Kha masa pen a ni masapen in Kihoupihna puanin biakbuk na ding sakta ding ahi.

³Huai sung ah theihpihna bawm na koih dia, bawm puanzak in na khuh ding ahi.

⁴Dohkan na la lut dia, a tung ah thil kizom a koih dingte kizom in na koih ding a; khawnvak koihna na lalut dia, a khawnvakte na det ding ahi.

⁵Theihpihna bawm ma ah gimlim adia dangkaeng maitam na koih dia, kongkhak puankhai biakbuk ah na koih ding ahi.

⁶Kihoupihna puanin biakbuk kongkhak ma ah haltum thillat maitam na koih ding ahi.

⁷Kihoupihna puanin leh maitam kikal ah tuikuang na koih dia, huai ah tui na koih ding ahi.

⁸A kimvel in huangsung na bawl dia, huangsung kongpi ah puankhai na khai dingtou ding ahi.

⁹Thaunilh nala dia, biakbuk na nilh ding a; huai sung a omteng teng toh, na hihsiangthou dia, a tuium-belsuan tengteng a siangthou ding hi.

¹⁰Haltum thillat maitam na nilh ding a; a tuium-belsuan tengteng toh, maitam na siangthousak ding. Huchi in maitam a siangthou penpen ding hi.

¹¹Tuikuang leh a khe na nilh dia, na siangsak ding ahi.

¹²Kihoupihna puanin kongkhak ah Aron leh a tapate na honpi dia, tui in na sil ding ahi.

¹³Puan siangthoute Aron na silhsak dia, na nilh dia, na siangthousak ding ahi; siampu nasepna mun a ka na a sep theihna ding in.

¹⁴A tapate n’on tonpih dia, puanak tung na silhsak ding ahi.

¹⁵A pa uh sathau na nilh bang in amau siampu nasepna mun a, ka na a sep theihna ding un thau na nilh ding ahi. A thaunilhna uh a khangkhang ua siampu hihna a hih taktak ding ziak in, a chi hi.

¹⁶Hiai bang in Mosi in a hihta a; TOUPA’N amah thu a piak bangzel in ahi, a hih.

¹⁷Hichi ahi a, a kum nihna, a kha masa pen, a kha a ni masapen ni’n, biakbuk dinsak in a omta hi.

¹⁸Mosi in biakbuk ading sakta a, a kingakna khuakkuakte a hen a, a singpekte a tung a, a chiangte a thunlut a, a khuamte a dingsak hi.

¹⁹Biakbuk tung ah puanin a zalhta a; a tunglam ah puanin khuhna a koih a; TOUPA’N Mosi thu a piak bang in a hihta hi.

²⁰Theihpihna a la a bawm sung ah a koih a, chiangte bawm tung ah a koih a; bawm tung lam ah chitna tutphah a koih hi.

²¹Bawm biakbuk sung ah a tawiluta, khuhna puanzak a zak a, theihpihna bawm a khuh hi. TOUPA’N Mosi thu a piak bang in a hihta hi.

²²Kihoupihna puanin sung ah dohkan a koih a, biakbuk pang mallam, puanzak pawlam ah.

²³TOUPA ma ah dohkan tung ah tanghoute kizom in a koih a; TOUPA’N Mosi thu a piak bang in a koih hi.

²⁴Kihoupihna puanin sung ah dohkan zawn ah, biakbuk sik simlam pang ah khawnvak koihna a koih hi.

²⁵TOUPA’N Mosi thu a piak bang in TOUPA ma ah khawnvakte a deta hi.

²⁶Huan puanzak ma ah kihoupihna puanin sung ah dangkaeng maitam a koih hi:

²⁷Huai tung ah namtui a hal a; TOUPA’N Mosi thu a piak bang in.

²⁸Biakbuk kongkhak ah puankhai a khai hi.

²⁹Kihoupihna puanin biakbuk kongkhak kiang ah TOUPA’N Mosi thu a piak bang in haltum thillat leh tangbuang thillat a lan hi.

³⁰Kihoupihna puanin leh maitam kikal ah tuikuang a koih a, huai ah tui a koih a, kisawpna ding in.

³¹Mosi leh Aron leh a tapate’n a khutte uh leh a khepekte uh huai ah a sil uhi.

³²Kihoupihna puanin sung ah a hoh ua, maitam kiang ah a hongpai nai ua TOUPA’N Mosi thu a piak bang in a kisil uhi.

³³Biakbuk leh maitam kimvel in huangsung a bawl a, huangsung kongpi puankhaite a khaita hi. Huchi in Mosi in nasep a zouta hi.

³⁴Huaikhit in meipi in Kihoupihna puanin a tuam a, TOUPA thupina in biakbuk a dimsak hi.

³⁵Huchi in Kihoupihna puanin sung ah Mosi a lut theita kei, a tung a meipi a kai ziak in leh, TOUPA thupina in biakbuk a dimsak ziak in.

³⁶Biakbuk tung apan meipi laktouh a, a om chiang in, Israel suante a khualzinna uah malam ah a pai zel uhi.

³⁷Himahleh meipi lak touh a, a omlouh chiang in, a kilak touh louh ni’n a zinkei uhi.

³⁸A khualzin sung teng uh Israel inn kawte mitmuh in sun in TOUPA meipi biakbuk tung ah a om a, zan in biakbuk tung ah meikuang in a om hi.