Read Paite Chin EKSODAS 7 Bible Online

EKSODAS 7 - Paite Chin bible

EKSODAS 7

¹TOUPA’N Mosi kiang ah, “En in, Pharo ading in Pathian in k’on bawlta. Huchi in na unaupa Aron na zawlnei ahi ding, a chi hi.

²Thu k’on piak tengteng na gen ding. Huchi in Aron na naupa in a gam apan a Israel suante sawlkhe ding in Pharo kiang ah a gen ding.

³Pharo lungtang ka khauh sak dia, Aigupta gam ah ka chiamtehnate leh ka thillamdangte ka pungsak ding hi.

⁴Himahleh, Aigupta tung a ka khut ka ngak theihna ding leh ka sepaihte leh ka mi Israel suante, vaihawmna thupite a Aigupta gam apan ka pi khiak theihna ding in, Pharo in nang a hon ngaikhe kei ding hi.

⁵Aigupta tung a ka khut ka likkhiak a, a lak ua pan Israel suante ka pikhiak chiang in, Aiguptate’n Kei, TOUPA ka hi chih a thei ding uh” a chi hi.

⁶Mosi leh Aron in TOUPA’N thu a piak bang in a hihta uhi.

⁷Pharo kiang a thu a genlai un, Mosi kum sawmgiat a upa ahi a, Aron kum sawmgiat leh thum a upa ahi.

⁸TOUPA’N Mosi leh Aron kiang ah thu a gen a, a kiang uah,

⁹“Pharo in na kiang ua nou ading in thillamdang suah un, a chih chiang in Aron kiang ah, Na chiang la inla, Pharo ma ah khia in, gul hongsuak hen, na chi ding” a chi hi.

¹⁰Mosi leh Aron Pharo kiang ah a lut ua, TOUPA’N thu a piak bang in a hihta uhi. Pharo leh a sikhate ma ah Aron in a chiang a khia a, gul a hongsuak hi.

¹¹Pharo in leng mipilte leh bumsiamte a sam a; Aigupta mitkhialdawi tawite’n a mitkhialdawi un huchibang mah in a hihta uhi.

¹²Amau leng michih in a chiang uh a khia ua, gulte a hongsuak uhi. Himahleh Aron chiang in amau chiangte a valhta hi.

¹³Pharo in a lungtang a khauhsak a, amau thu a ngaikhe kei, TOUPA’N a chih bang in.

¹⁴TOUPA’N Mosi kiang ah, “Pharo lungtang a khauhta a, mite paisak a nial hi.

¹⁵Zingsang in Pharo kiang ah hoh in. Ngai in, lui ah a hoh hi. A hongpai ngak in luigei ah na ding in. Na khut in huai chiang, gul hongsuak pen na tawi ding ahi.

¹⁶A kiang ah, ‘Hebrute TOUPA Pathian in na kiang ah a honsawl a, Gamdai a ka na a septheihna ding un, ka mite paisak in.’ Ngai in, tuma siah in na ngeingaih kei” a chi, chi in.

¹⁷Hichibang in TOUPA’N a chi, “Hiai ah TOUPA ka hi chih na thei ding. Ngai in, Ka khut a chiang in lui a om tuite ka sat dia, sisan a hongsuak ding uhi.

¹⁸Lui a om ngasate a si ding ua, lui a uih dia; Aiguptate’n lui tui a dawn theikei ding uhi” a chi hi.

¹⁹TOUPA’N Mosi kiang ah thu a gen a, “Na chiang la inla, Aigupta tuite tung ah, a tuinakneite tung ah, a luite uh tung ah, a tuichinte uh tung ah leh a tuilite uh tung ah, sisan a honsuah theihna ding un, Aigupta gam pumpi a singhawmte leh suanghawmte a sisan a om theihna ding in na khutlik khia in, Aron kiang ah chi in,” a chi hi.

²⁰TOUPA thupiak bang in, Mosi leh Aron in a hih uhi. A chiang a liktou a, Pharo leh a sikhate mitmuh in, lui a om tuite a satta a, lui a om tuite sisan a hongsuak vek uhi.

²¹Lui a om ngasate a si ua; lui a uih a, Aiguptate’n lui tui a dawn theita kei uhi. Aigupta gam pumpi ah sisan a omta hi.

²²Aigupta mitkhialdawi tawite’n leng a mitkhialdawi tawi un huchi mah bang in a hih uhi. Pharo lungtang a khauh a, TOUPA’N a chih bang in amau a ngaikhe kei hi.

²³Pharo a kihei a, a inn ah a paita a, huai thil in a lungtang a khoih kei hi.

²⁴Aigupta tengteng in dawn ding zong in luikim a khuat uhi. Lui tui lah a dawn theikei uhi.

²⁵TOUPA’N lui a satnung ni sagih a hong chingta hi.