Read Paite Chin EKSODAS 8 Bible Online

EKSODAS 8 - Paite Chin bible

EKSODAS 8

¹TOUPA’N Mosi kiang ah thu a gen a, “Pharo kiang ah hoh inla, a kiang ah hichi’n chi in, TOUPA’N hichi’n a chi, ‘Ka na a hon sepsak theihna ding un, ka mite paisak in.’

²Amau paisak na nial leh, ngai in, ukengte in na gam tengteng ka gawt ding hi.

³Lui in ukeng a tam a tam a hon suahkhe ding ua, huaite a hong paitou ding ua, na inn ah a honglut ding ua, na lupna dansung ah, na lupna tung ah, na sikhate in ah, na mite tung ah, na thuk ah leh na tangbuang bawlna ah a hongom ding uhi.

⁴Ukengte nang tung ah leh, na mite tung ah leh, na sikhate tung ah a hong kaltou ding uhi” chi in.

⁵TOUPA’N Mosi kiang ah, “Aron kiang ah, luinak neite tung leh, luite tung leh, tuichinte tung ah na chiang toh na khutlik inla, Aigupta gam tung ah ukengte hon paitousak in, chi in” a chi hi.

⁶Aron in Aigupta luite tung ah a khut a lik a; ukengte a hong paitou ua, Aigupta gam a tuamta uhi.

⁷Huchi mah bang in mitkhialdawi tawite’n a mitkhialdawi un a hih ua, Aigupta gamtung ah ukengte a hon latou uhi.

⁸Huaitak in Pharo in Mosi leh Aron a samsaka, “Kei leh ka mite apan ukengte a lakmang theihna ding in, TOUPA ngen un. Mite ka paisak ding, TOUPA kiang a kithoihna a bawl theihna ding un” a chi hi.

⁹Mosi in Pharo kiang ah, “Ka tung ah kiuangsak in; Nang ading leh, na sikhate ading leh, na mite ading leh nang leh na innte apan, tui a a om theihna ding ua ukengte lakmang nadia chikchiang a hon ngetsak ding ka hia?” a chi hi.

¹⁰Aman, “Zingchiang in” a chi hi. Aman, “Na thu bang hi hen. TOUPA ka Pathian bang kuamah a omkei, chih na theihna ding in.

¹¹Nang leh, na innte uh leh, na sikhate leh na mite apan ukengte a pawtkhe ding ua; lui kia ah a omta ding uhi” a chi hi.

¹²Mosi leh Aron Pharo apan a paikhia ua; Pharo gawtna dia ukengte a koih tungtang ah TOUPA kiang ah Mosi a thum hi.

¹³TOUPA’N Mosi thu bang in a hihta a; innte leh, khuate apan leh loute apan ukengte a sita uhi.

¹⁴Huchi in a kaikhawm ua, a vum ua, gam a uihta hi.

¹⁵Himahleh Pharo in a tung a zangta chih a theihin, a lungtang a khauhsaka; amaute a ngaikhe kei; TOUPA gen bang in.

¹⁶TOUPA’N Mosi kiang ah, “Aron kiang ah, Na chianglik inla, gam a leivui sat in, Aigupta gam pumpi a hik a hong omna ding un” chi in, a chi hi.

¹⁷Huchibang in, a hih ua; Aron in a chiang toh a khut a lik a, lei a leivui a sat a, mi tung leh sa tung ah hik a hong hita a; gam a leivui teng Aigupta gam pumpi ah hik a hongsuak vekta hi.

¹⁸Mitkhialdawi tawite’n leng a mitkhialdawi un hikte omsak ding in huchibang in a hih ua, himahleh a hih theikei uhi. Huchi in mi tung leh sa tung ah hik a omta hi.

¹⁹Huaitak in mitkhialdawi tawite’n Pharo kiang ah, “Hiai Pathian khutzung ahi,” a chi uhi. Himahleh Pharo lungtang a khauhsak a, TOUPA’N a chih bang in amau a ngaikhe kei hi.

²⁰TOUPA’N Mosi kiang ah, “Zingkhang in thou inla, Pharo ma ah ding in. Ngai in, tuilam zuan a, a hong paikhiak in a kiang ah, Hichibang in TOUPA’N a chi, Ka na a sep theihna ding un, ka mite paisak in.

²¹Huchi lou a, ka mite na paisak kei leh, ngai in, na tung ah leh na sikhate tung ah leh, na mite tung ah leh, na inn sung ah thou honpi ka sawl ding. Huchi in Aiguptate innte thou honpi in a dim ding, a omna lei uh toh.

²²Huai ni’n ka mite tenna, Gosen gam ka sat khen ding, huai a thou honpi a om louhna ding in; Huchi a gam sung ah kei TOUPA ka hi chih na theihna ding in.

²³Ka mite leh na mite kikal ah kikhenna ka koih ding. Zingchiang in hiai chiamtehna a om ding hi” a chi hi.

²⁴Huchibang in TOUPA’N a hih a; Pharo inn sung leh a sikhate inn sung leh, Aigupta gam tengteng ah, thou honpi lungkhamhuai tak a hongpaita a; thou honpi ziak in gam a segawp hi.

²⁵Pharo in Mosi leh Aron a samsaka, “Pai unla, gam sung ah na Pathian kiang uah va kithoih un” a chi hi.

²⁶Mosi in, “Huchibang a hih a dik kei. TOUPA ka Pathian uh kiang ah Aiguptate zakdah kithoihna lan ding ka hih ziak un. Ngai in, a muh ua Aiguptate zakdah kithoihna lan ding ka hi uh maw, suang in a hon deng kei ding ua hia?

²⁷Gamdai ah ni thum lam ah ka pai ding ua, a hon thupiak ding bang a TOUPA ka Pathian uh kiang a kithoihna bawl ding in” a chi hi.

²⁸Pharo in, “Gamdai a TOUPA na Pathian uh kiang a na kithoih theihna ding un k’on paisak ding. Gamlapi pai kei peuh le uchin. Kei ading in hon ngetsak in” a chi hi.

²⁹Mosi in, “Ngai in, nang apan ka paikhe dia, Pharo apan, na sikhate apan, na mite apan zingchiang a thou honpi a paimang theihna ding in TOUPA ka ngen ding. Himahleh TOUPA kiang a kithoih dia a mite paisak ding in Pharo lepchiahtak in gamta nawn kei hen” a chi hi.

³⁰Pharo apan Mosi a pawtkheta a, TOUPA a ngenta hi.

³¹Huchi in Mosi thu bang in TOUPA’N a hihta a; Pharo apan leh a sikhate apan thou honpi a lamangta a; khat lelleng a om nawnta kei hi.

³²Hiai hun in leng Pharo in a lungtang a khauhsak a, mite a paisak nuamta kei hi.