Read Paite Chin EKSODAS 9 Bible Online

EKSODAS 9 - Paite Chin bible

EKSODAS 9

¹Huan, TOUPA’N Mosi kiang ah, “Pharo kiang ah valut inla, TOUPA Hebrute Pathian in, Ka na a sep theihna ding un, ka mite paisak in.

²Amaute paisak na nial a, amau na let lailai leh,

³Ngai in, TOUPA khut lou a om na bawnghonte tung ah, sakolte tung ah, sabiltungte tung ah, sangawngsaute tung ah, bawngtalte tung ah leh belamte tung ah a tu ding. Hipi se mahmah a om ding hi.

⁴TOUPA’N Israelte bawnghon leh Aiguptate bawnghon a satkhen ding. Israel suante a lam bangmah si a omkei ding.

⁵TOUPA’N hun biseh a septa, zingchiang in TOUPA’N gam sung ah hiai a hih ding” chi’n vagen in.

⁶A zing in TOUPA’N hiai thil a hih a, Aigupta bawnghon tengteng a sita uhi. Himahleh Israel suante bawnghonte khat lel leng a si kei hi.

⁷Pharo in mi a sawl a, ngai in, Israel bawnghon lak ah khat lel leng a sikei mahngei hi. Himahleh Pharo lungtang a khauh a, mite a paisak kei hi.

⁸TOUPA’N Mosi leh Aron kiang ah, “Meiphualpi vut na khutdim un la unla, Pharo muh in Mosi in vanlam ah theh hen.

⁹Aigupta gam ah leivuinen a hongsuak dia, Aigupta gamsung teng ah, mi tung leh sa tung ah meimatum setak a honghi ding” a chi hi.

¹⁰Meiphualpi a vut a la ua, Pharo mai ah a dingta uhi. Mosi in vanlam ah a thehtou a; mi tung leh sa tung ah, meimatum a hong hita hi.

¹¹Huchi in meimatumte ziak in mitkhialdawi tawite Mosi ma ah ading theita kei ua; mitkhialdawi tawite tung leh Aiguptate tung ah lah meimatum a om ngal a.

¹²TOUPA’N Pharo lungtang a khauhsak a, Mosi kiang a TOUPA’N a gen bang in amau thu a ngaikhe kei hi.

¹³TOUPA’N Mosi kiang ah, “Zingkhang in thou inla, Pharo ma ah ding inla, a kiang ah, TOUPA Hebrute Pathian in hichi in a chi, Ka na a sep theihna ding un ka mite paisak in.

¹⁴Hiai hun in na lungtang tung leh na sikhate tung leh na mite tung a ka gawtna tengteng hontun ding ka hi ngal a. Lei pumpi ah kei bang kuamah a omkei, chih na theihna ding in.

¹⁵Tuin ka khut zankhia in nang leh na mite hipi in hon gawt leng lei apan satkhiat in na om ding hi.

¹⁶Himahleh hiai ziak in ahi, nang k’on tunding, nangmah a ka thilhihtheihna ka latsak theihna ding leh huchi a leitung tengteng a ka min a ki puankhiat theihna ding in.

¹⁷Amaute paisaklou ding in, ka mite kalh in nang leh nang na kiliansak nalai maw?

¹⁸Ngai in, zingchiang tu hun in a piantung a kipan tutan a om ngei nailou Aigupta gam ah gialpi petmah ka zusak ding hi.

¹⁹Huaiziak in, tuin mi sawl inla, lou a na neih tengteng leh na gantate kaikhawm in. Michih tung leh sa lou a kimu tung ah, in lam a hong kihawl lou tung ah, gial a hong kesuk dia, a si ding uhi” a chi, chi in.

²⁰Kuapeuh Pharo sikhate lak a TOUPA thu laute’n a sikhate leh a ganta uh inn sung ah a hawllut uhi

²¹TOUPA thu khawksa loute’n a sikhate uh leh a gantate uh lou ah a nusia uhi.

²²TOUPA’N Mosi kiang ah, “Aigupta gam tengteng a, mi leh sa tung leh Aigupta gam tengteng a lou a haichi tung teng a gial a om theihna ding in, vanlam ah na khut zankhia in” a chi hi.

²³Mosi in vanlam ah a chiang a zankhia hi. TOUPA’N van ging leh gial a honsawl a, leitung zui in mei a taita a; TOUPA’N Aigupta gam tung ah gial a zu sakta hi.

²⁴Huchi in gial a om a, gial toh kihel mei thupi mahmah, nam a hih nungsiah Aigupta gam a, huchibang om ngeilou.

²⁵Gial in Aigupta gamsungte a lou omte teng a dengta hi. Mi leh sa; lou a haichi chih gial in a dengta a, gam a singchih a kitansakta hi.

²⁶Israel suante tenna, Gosen gam kia ah gial a omkei hi.

²⁷Pharo in mi a sawl a, Mosi leh Aron a sam sak a, a kiang uah, “Tutung in ka khialta. TOUPA a diktat a, kei leh ka mite ka gilou uhi.

²⁸TOUPA ngen in, a hunta hi, vanpiging thupi leh gial thupi a om nawn louhna ding in. K’on paisak dia, na om nawn kei ding uh” a chi hi.

²⁹Mosi in a kiang ah, “Khopi apan ka pawt khiak chiang in TOUPA lam ah ka khutte ka zak dia; vanpiging a dai dia, gial leng a om nawn kei ding; huchi a lei TOUPA a a hih dan na theih theihna ding in.

³⁰Himahleh nang leh na sikhate’n ahihleh, TOUPA Pathian na lau naikei ding uh chih ka thei” a chi hi.

³¹Pat leh barli buh den in a om a, barli buh a tuipumta a, pat a gah a takta ngal hi.

³²Himahleh huitbuh leh buhman zaw den in a omkei; a nou lai ziak un.

³³Pharo apan Mosi in khopi a pawt khiak san in, TOUPA lam ah a khutte a zak a; vanpiging leh gial a dai a, lei ah vuah buak in a omta kei hi.

³⁴Pharo in vuah leh gial leh vanpiging a tawpta, chih a theih in, a khial tamsem a, amah leh a sikhate’n a lungtang uh a khauhsak uhi.

³⁵Huchi in Pharo lungtang khauhsak in a om a, Mosi kam a TOUPA’N a gen bang in Israel suante a paisak nuam kei hi.