Read Paite Chin JOB 1 Bible Online

JOB 1 - Paite Chin bible

JOB 1

¹Uz gam ah mi khat a om a, a min Job ahi; amah mi hoihkim leh tang ahi a, Pathian kihta a, hoihlou mudah ahi.

²Aman tapa sagih leh tanu thum a nei hi.

³A neih leh lam leng belam sang sagih, sangawngsau sang thum, bawngtal za nga leh sabiltungnu za nga leh inkuan thupi mahmah ahi: huchi in hiai mipa suahlam tate tengteng lak ah a thupipen ahi.

⁴Huan a tapate a kuan ua khat chiat inn ah a ni ni’n Ankuangluina a nei ua; huchi in mi a sawl ua a sanggamnumei thumte uh amau kiang a ne ding leh dawn ding in a samsak uhi.

⁵Huan hichi ahi a, a Ankuanglui sanlaitak un, Job in mi a sawl a amaute a hih siangthou a, zingsang in beltak in a thou a, avek ua zah dungzui in haltum thillatte a lan: Job in, “Ka tapate’n thil a hihkhial un, a lungtang un Pathian a hamsiat kha ding uh” a chi hi. Hichibang in Job in a hih gige hi.

⁶Huchi in TOUPA ma a Pathian tapate a hong kilak ni uh a om a, a lak uah Setan leng a hongpai sam hi.

⁷Huchi in TOUPA’N Setan kiang ah, “Koi a hong kipan na hia?” a chi hi. Setan in TOUPA a dawng a, “Lei pumpi siksuak a vialvak a, asung a touvak a sukvak vak ka hi” a chi hi.

⁸TOUPA’N Setan kiang ah, “Ka sikha Job na ngaihtuah ngei hia? Amah bang a hoihkim leh mitang, Pathian kihta a hoihlou mudah lei ah lah kuamah a om ngalkei a” a chi hi.

⁹Setan in TOUPA a dawng a, “Bangmahlou dia Job in Pathian kihta ahi maw?

¹⁰Amah kimvel in, a inn kimvel in leh a neih tengteng kimvel in, ning chiteng ah umna na bawl kei maw? A khut nasep na vualzawl a, gamsung ah a neih leh lam a pung hi.

¹¹Himahleh tuin na khut suahkhia inla, a neih tengteng khoih in, huchi in na maitang ah nang a hon gense ding hi” a chi hi.

¹²TOUPA’N Setan kiang ah, “Ngai in, a neih tengteng nang thu ahi; amah mah tung ah kia na khut kha ken” a chi hi. Huchi in TOUPA ma a kipan in Setan a kuan khia hi.

¹³Huan a tapate leh a tanute’n a unaupa uh upapen inn a a nek ua uain a dawn lai un ni khat thu in a hongtung hi.

¹⁴Job kiang ah sawltak khat a hong a, “Bawngtalte’n lei a let ua, sabiltungte a kiang ah a gamta ua:

¹⁵Sheba mite’n amau a delh ua, a pimang uh; ahi, namsau hiam in sikhate a that ua; huan nang hilh ding in kei ke leu ka suakta hi” a chi a.

¹⁶Huchi a thu a genlai in midang khat leng a hong a, “Van a kipan in Pathian mei a kia a, belamte leh, sikhate a kangmang a, amau a kangtum hi: huan nang hilh ding in kei ke leu ka suakta hi” a chi hi.

¹⁷Huchi a thu a genlai in, midangkhat a honglai a, Kaldai mite’n pawl thum a bawl ua, sangawngsaute a delh ua, a pimangta uhi, huan namsau hiam in sikhate a that ua; huan nang hilh ding in kei ke leu ka suakta hi” a chi hi.

¹⁸Huchi a thu a genlai in, midang khat mah a hong a, “Na tapate leh na tanute’n a unaupa upapen inn a a nek ua uain a dawnlai un:

¹⁹Ngai in gamdai a kipan in huih thupi a hongnung a, huai inn ning lite a hon nuai a, tangvalte tung ah a chim a, a si uh: huan nang hilh ding in kei ke leu ka suakta hi” a chi hi.

²⁰Huchi in Job a thou a, a puanaktual a botkek a, a lu a metsiang a, leitung denna in a kinei a, Pathian a beta hi;

²¹Aman, “Ka nu sul a kipan vuaktang in ka hong a, huailam ah vuaktang in ka kik ding: TOUPA’N a pia a, huan TOUPA’N a lamangta hi; TOUPA min phat in om hen” a chi hi.

²²Hiai tengteng ah Job in a hihkhial kei a, haihuaitak in Pathian leng a mawhsa kei hi.