Read Paite Chin JOB 11 Bible Online

JOB 11 - Paite Chin bible

JOB 11

¹Huan Zophar Naamathmi in a dawng a, hichi in a chi a:

²“Thu tampite dawnlouh ding ahi a hia? Mi houlimna a dim siamtansak ding hia?

³Na kisaktheihnate’n mite daisak ding hia? na simmawh chiang in, kuamah in nang hon zahlaksak lou ding uhia?

⁴Ka thuhilh a siangthou a, na mit uah ka siang hi, na chi ngal a.

⁵Himahleh Pathian in thugen maizen le zaw, nang dem in a mukte hongleh;

⁶Huchi in pilna thugukte nang a hon ensak ding a, a theihna ah thuah tampi ahi chih: huaiziak in na thulimlouhna sang a tawmzaw na lak ah Pathian in nang a honphut chih thei in.

⁷“Zon in Pathian na mu thei diam; hoihkimna ah Thilbangkim hihthei na mu thei diam?

⁸Van bang in a sang a; bang na hihthei dia? Sheol sang in a thuk a; bang na theithei dia?

⁹Huai a tehna lei sang in a sauzaw a, tuipi sang in a zazaw hi.

¹⁰Paisuak henla, man henla, vaihawmna ah sam leh, huchi’n kuan amah a dal thei dia?

¹¹Aman lah mi bangmah loute a thei ngal a: ngaihtuah kei mahleh, thu limlouhna leng a mu hi.

¹²Mihing theihsiamna bei in theihsiamna a nei ding, sabiltung nou mihing a a pian chiang in.

¹³“Na lungtang na koih dik a, amah lam a na khutte na zak leh;

¹⁴Na khut a thulimlouhna a om a, gamlapi a na koihkhiak a, gitlouhna na puanin a na tensak kei leh;

¹⁵Gensiatna ding omlou in na mai na daksak ding a; ahi, na kip ding a, na lau kei ding:

¹⁶Na haksatna na mangngilh ding ziak in; tui luangmang bang in na theigige ding hi:

¹⁷Sunlai sang in na hinna a telzaw ding a; khomial om mahleh, zingsang bang ahi ding hi.

¹⁸Lametna a om ziak in, na kipta ding hi; ahi, amah tanchin na zong ding a, muang in na khawlta ding hi.

¹⁹Lup leng na lum ding a, kuamah in nang hon lausak kei ding uhi; ahi, mi tampi’n nang honzong ding uhi.

²⁰Himahleh gilou mitte a zuausuak ding a, a suakta kei ding ua, a lametna uh kha khah ahi ding hi.”