Read Paite Chin JOB 12 Bible Online

JOB 12 - Paite Chin bible

JOB 12

¹Job in a dawng a, hichi in a chi hi:

²“Ginlelh vuallouh in mite zaw na hi peuhmah ua, nou toh pilna a si ding hi.

³Himahleh noute bang in theihsiamna ka nei hi; nou sang in ka niam zaw kei hi: ahi, hiaite bang thilte kuan a theikei a?

⁴Kei zaw mi invengte adia nuihzabuk ka hi a, kei, huai Pathian sam a, huai aman amah a dawnpa, mi dik, mi hoihkim, nuihzabuk ka na hi.

⁵Omnuam a om ngaihtuahna ah vangsiatna muhsitna a om a; himahleh a khe uh teute ading in mansa in a om hi.

⁶Suamhatmite puaninte a lohching a, Pathian hehsakte a bit ua; a khut a pathian tawite Pathian in tampi a pia hi.

⁷“Himahleh gamsate dong in, huchi in amau nang a hon sinsak ding uh; huan huihkhua a vasate’n, nang a honhilh ding uhi:

⁸Ahihkeileh lei kiang ah thu gen in nang a hon sinsak ding ua; tuipi a ngasate’n na kiang ah a phuang ding uhi.

⁹Hiai tengteng ah, TOUPA khut in a hihkhin chih kua ahia theilou?

¹⁰Amah khut ah thil hing chiteng kha leh, mihing tengteng hatna a om hi.

¹¹Bil in thute enchian in, Kam in an a chiam kei maw?

¹²Mi upate kiang ah pilna a om a nite sauna ah theihsiamna a om hi.

¹³“Amah kiang ah pilna leh hatna a om; aman thupha leh theihsiamna a nei.

¹⁴Ngai in, a kaipuk a, a kilam nawn theikei ding; mihing a khakbing a, kuama’n a hong theikei ding.

¹⁵Ngai in, tui a ching a a kang hi; a khahkhia a, lei a tumvek hi.

¹⁶A kiang ah hatna leh pilna a om a; khem a omte leh khempa amah a ahi.

¹⁷Thuhilhmite lohsam in a pimang a, huan vaihawmmite mihai in a bawl hi.

¹⁸Kumpipate kolte a sut a, kawnggak in a kawng uh a gak hi.

¹⁹Siampute lohsam in a pimang a, mi hatte a zou hi.

²⁰“Muan mite thugen a suan a, upate theihsiamna a lamang hi.

²¹Lalte tung ah muhsitna a buak a mihatte kawnggak a phel hi.

²²Mial a kipan in thil thukte a mukhia a, sihna limliap khovak ah a hon lakhia hi.

²³Namte a pungsak a, amau a hihsia: namte a thehzak a, a lakhawm nawn hi.

²⁴Lei a mite hausate lungtang a lamang a, gamdai a lampi omlouhna ah amau a vakvai sak hi.

²⁵Vakna bei in khomial ah a mai ua, huchi in zukhammi bang in amau a hoisak hi.”