Read Paite Chin JOB 13 Bible Online

JOB 13 - Paite Chin bible

JOB 13

¹“Ngai in, ka mit in hiai tengteng a mu hi, ka bil in huai za in a theisiamta hi.

²Na thei uh, huai mah ken leng ka thei hi: nou sang in ka niam zaw kei hi.

³Thilbangkim hihthei kiang ah thu ka gen mahmah ding, Pathian toh houlim ka ut hi.

⁴Himahleh nou zuau phuakte na hi ua, a phattuambei damdawisiam na hivek uhi.

⁵Aw na vek un dai sipsip le uchin maw; na pilna uh hi ding hiven.

⁶Tuin ka thusut za un, ka mukte ngetna ngaikhia un.

⁷Pathian ading in diloutak in thu na gen ding uam, amah ading in khemhattak in na houlim ding uam?

⁸Ami na zahtak ding uam? Pathian adin na sual ding uam?

⁹Nou a hon zonkhiak a hoih hia? Ahihkeileh min mi a khem bang in, amah na khem ding uam?

¹⁰Nou a honsal mahmah ding, a guk a mite na zahtak uleh.

¹¹A hoih tungtuanna in nou a hon lausak kei dia hia, nou tung ah a kihtakhuaina a ke kei diam?

¹²Na thupilte uh vut banglel ahi, Manna bei paunak ahi a, na kidalnate uh tungman kidalnate ahi.

¹³“Dai unla, thu ka gen theihna ding in, hon omsak maimai un, ka tung ah a hongtung ding hongtung hen.

¹⁴Bangding in ka ha in ka sa kei ding a, ka khut ah ka hinna koih ding ahia?

¹⁵Aman honthat mahleh, amah ka ngaklai ding: a ma ah ka lampite ka kem hoih lailai ding hi.

¹⁶Hiai leng ka hotdamna ahi ding; Pathian limsaklou mi a ma a hongpai lou ding a hih ziak in.

¹⁷Ka thugen thanuamtak in za un, ka thuphuan na na bil sung uah om hen.

¹⁸Ngai un, tuin ka thu ka bawlhoihta a; ka diktat ahi chih ka thei hi.

¹⁹Kei hon kiselpih ding amah kua ahia? Kei tuin ka dai dia kha ka khah ding hi.

²⁰Ka tung ah thil nih hih kei phot le uchin, huchi in na mai a kipan ka bu kei ding hi.

²¹Kei apan gamla ah na khut kaikik in; na lauhuaina in hon lausak ken.

²²Huaichiang in honsam lechin, k’on dawng ding; ahihkeileh hon pausak inla, hon dawng in.

²³Ka thulimlouhnate leh khelhnate bang ahia? Ka tatlekna leh ka khelhna hon theisak in.

²⁴Bangdia na maisel a na melma dia honbawl na hia?

²⁵Singnah mutleng na hihbuai dia hia? Buhpawl keu na delh dia hia?

²⁶Nang lah kei dem in khatak in na gelh a, ka tuailai thulimlouhnate n’on luahsak hi:

²⁷Ka khete leng kol na bunsak a, ka lampite tengteng na chiamteh hi; ka khenuai kim ah gi na khung hi.

²⁸Mihing zaw thilmuat leh nget nekgawp puansilh bang in a mangthang hi.