Read Paite Chin JOB 14 Bible Online

JOB 14 - Paite Chin bible

JOB 14

¹“Mihing, numei apan piang nite tomchik ahi a, buaina ngen in a dim hi.

²Pak bang in hong dawnkhia a, a vuai nawn pah, limliap bang in a tai a, a om gige kei.

³Mi huchibang tung ah na mit hak in, vaihawmna ah kei n’on pi dia hia?

⁴Thil nin a kipan in kuan ahia thil siang lakhe thei? Kuamah in.

⁵A nite sehsa ahi chih thei in, na kiang ah a khate simna a om a, a kan theilouh ding in a gamgite na septa hi;

⁶Amah enken, a khawl theihna ding in, kiloh bang a, a ni a hihkim matan.

⁷“Phukpaih in om mahleh, a hong selnawn ding a, a hiang nou a tawp kei ding, chih sing adin lametna lah a om ngal hi.

⁸A zung lei ah upa mahleh, A kungpi lei ah sita mahleh;

⁹Tuigim ziak in a hongnou thak dia, singsuan bang in bawkte a hon neikhe nawn ding hi.

¹⁰Mihing a si a, a mang zel hi: ahi, mihing in kha a khah a, huan koi ah a om a?

¹¹Tuipi a kipan tuite a pai bang in, luipi bel a tul a, a kang hi;

¹²Huai mah bang in mihing a lum a a thoukei hi: vante a om nawnlouh matan, a khanglou kei ding uh, a ihmu uh leng a halh khe sam kei ding uhi.

¹³Aw Sheol ah honsel lechin aw, na thangpaihna a man masiah hon na guk kep lechin, hun sehsa hon na pia in, kei hon theigige lechin aw;

¹⁴Mi sileh a hingnawn diam? Ka galdouna leh nasepna ni tengteng ka ngak ding a, ka suahtakna a hongtun ma tan in.

¹⁵N’on na sam dia, k’on dawng ding hi: na khut nasep n’on lunggulh ding hi.

¹⁶Tuin ka kalsuante na sim a: ka khelhnate na chiamteh hi.

¹⁷Ip sung ah ka tatlekna bilh in a om a, ka thulimlouhna na gonggak hi.

¹⁸“Mual kipuk bangmahlou a honghi taktak a, a mun a kipan in suangpi suan in a om hi;

¹⁹Tuite’n suang a kiamsak ua; leivui a kibawl munsangte na taimang a; huan mihing lametna na hihsia hi.

²⁰Tangtawn in amah na zou a, a pai a; a mel na lamdangsak a, na sawlmang hi.

²¹A tapate zah in a om ua, aman a theikei; hihniam in a om ua, himahleh aman amau ahi chih a theikei hi.

²²Himahleh a tung a sa in natna a nei a, asung ah a kha in a sun hi.”