Read Paite Chin JOB 15 Bible Online

JOB 15 - Paite Chin bible

JOB 15

¹Huchi in Eliphaz Teman mi in a dawng a, hichi in a chi hi:

²“Mi pil in theihna bangmahlou toh dawnna a bawl in, suahlam huih in a gilpi a dimsak sak diam?

³Houlimna phatuamlou thu a ngaihtuah in, ahihkeileh hoih a hih theihna louh ding a thugente a ngaihtuah diam?

⁴Ahi, launa na hihmang a, Pathian ma a kipiakzohna na dal lai hi.

⁵Na kam in na thulimlouhna a sinsak a, zekhemhat mi lei na tel ngal a.

⁶Nang mahmah kam in siamlouh a hon tangsak a, kei hilou in; ahi, nang dem in nangmah mukte mah in hon theihpih hi.

⁷“Mihing piang masapen hi hia? Ahihke’h tangte om ma a lakkhiak na hi maw?

⁸Pathian thuhilh guk na za ta hia? Huan pilna na kikoih hoih hia?

⁹Ka theihlouh uh bang na thei a? kou a omlou bang na theisiam a?

¹⁰Ka lak uah samkang leh upa mahmah a om tuaktuak, na pa sang a nakpi a upazaw.

¹¹Pathian nepnate leh siamtak a honhilhte nang adia neu lua uhia?

¹²Bangdia na lungtang in nang hon pimang ahia? Bangdia na mitte phia ahia?

¹³Huchi a Pathian dem a na lungsim na hei a, na kam apan a huai thute na pawtkhiak sak.

¹⁴Mihing bang ahia, a sian ding? Numei apan piang amah kua ahia a diktat ding?

¹⁵Ngai in, a misiangthoute ah muanna a nga kei a: a mitmuh in vante a siang kei uhi.

¹⁶Mi kihhuai leh sia, mi thulimlouhna tui bang a dawn, siang keina sem in chia:

¹⁷“K’on ensak ding, honza in; huan ka muhsa ka phuang ding:

¹⁸Mipil kuate in ahia a pipute ua kipan na thu gen a, a im louh uh;

¹⁹Amau kiang kia ah gam piak in a om a, mikhual kuamah a lak uah a pai kei uh:

²⁰Migilou in a damsung ni teng in natna a thuak a, nuaisiah hatmi adia khawlkhawm kumte zah mah.

²¹Launa ging a bil ah a om a; hauh lai in lokmi a tung ah a hongpai ding hi:

²²Khomial a kipan a hongkik ding chih a um kei a, namsau a ngak in a om hi.

²³Tanghou zong in a vakvai a, Koi a om ahia? chi in. Khomial ni a kiang chin ah mansa in a om chih a theikei hi.

²⁴Dahna leh haksatna in amah a lausak a; kumpipa galdou dia mansa bang in, amah a zou uhi.

²⁵Pathian dou ding a khut a likkhiak ziak in, Thilbangkim hihthei dou ding a kisathei tak a om a,

²⁶A lum, a tuamna sahtaknei toh amah dou a a tai teitei ziak in;

²⁷A thau a a maitang a khuh a, a gil a thau a kholkhawm a,

²⁸Khopi tulsa a teng a, kuamah ten tuak louhna innte, segawp ngiingei dingte a luah ziak in;

²⁹A hau kei ding a, a neih leh lam a om gige kei ding a; amah lei ah zung a kai kei ding;

³⁰Khomial a kipan a suakta kei ding a, meikuang in a selnoute a kangkeu ding a, a paklunlaite a mut mang ding.

³¹Amah kikhem in, banglou ah muang kei hen: bangmahlou lah a thukna hi ding ahi ngal a.

³²A hun ma in hihzoh in a om dia, huan a hiang nou kei ding hi.

³³Grepgui bang in a gah min lou a singpulh dia, olive bang in a pak a paikhe ding.

³⁴Pathian limsaklou kithuahpihna hut ding ahi a, golhna puaninte lah mei in a kangmang ding hi.

³⁵Siatna a pai ua, thulimlouhna a suakkhe sak uh, a lungtang un khemna a opkeuh uhi.”