Read Paite Chin JOB 16 Bible Online

JOB 16 - Paite Chin bible

JOB 16

¹Job in a dawng a, hichi in a chi hi:

²“Huchibang thil tampi ka zata hi: lungmuanmi chimtakhuai ngen na hi uhi.

³Thu bangmah loute’n tawp a nei ding uam? Ahihkeileh dawng ding a nang hon hihheh bang ahia?

⁴Nou bang in keileng ka pai theisam hi; na kha uh ka kha mun a om hileh, noute dem a thute kaikhawm a, ka lu hon sinkhum thei ding hi vengin.

⁵Himahleh ka kam in nou k’on hatsak ding a, ka muk a muanna in na lungkhamna uh k’on nem ding.

⁶“Thu gen mah leng, ka dahna nep in a omkei a: doh mah leng, hihnop in ka om ahia?

⁷Himahleh a hon chimtak sakta a: ka lawmte tengteng na hihgamta hi.

⁸Huan kiptak in na honlen a, huai kei demna theihpihna ahi: huchi in ka gawnna kei dem in a thou a, ka mai tang ah a theisak hi.

⁹A hehna in kei a hon botkek a, a honsawi hi; a ha a hon gawi khum a: ka tung ah ka gal in a mit a tat hiam hi.

¹⁰A kam uh lianpi in a honkat khum ua; simmohtak in ka biang ah a hon beng uh: kei dou ding in a kikai khawm ua.

¹¹Pathian in Pathian limsakloute kiang ah a honpe khia a, migiloute khut ah a hon paikhia hi.

¹²Om nuam in ka om, a hon kitamsak a; ahi, ka ngawng in a honman a, honpai nen hi: a muitum ding in a hon tungtou hi.

¹³A thalkapmite’n ka kimvel ah a hon um ua, ka sisan guite a bottat a, a hawi kei; lei ah ka sinkha a sungkhia hi.

¹⁴Siatna tung ah siatna in a hon sesak a; galhat bang in ka tung ah a tai.

¹⁵Ka vun tung ah saiip ka khui a, leivui ah ka kingata hi.

¹⁶Kahna in ka mai a hoihta kei a, ka mitvunte ah sihna limliap a om hi;

¹⁷Ka khut ah hiamgamna omkei mahleh, ka thumna siangthou mahleh.

¹⁸“Aw lei, ka sisan khuh ken, huan ka kahna in khawlmun neikei hen.

¹⁹Tu mahmah in, Ngai in, a hon theihpih van ah a om a, kei hon theihpihpa tungsang ah a om hi.

²⁰Ka lawmte’n hon nuihsan ua, himahleh ka mit in Pathian ah khituite a sungkhia hi;

²¹Huchi a Pathian lak a mihing dikna a letkip theih a, invengte lak a mihing tapa dikna a letkip theihna ding in:

²²Kum tawmkha a hongtun chiang in, ka kiknawn louhna ding lampi ah ka paita ding ahi.”