Read Paite Chin JOB 18 Bible Online

JOB 18 - Paite Chin bible

JOB 18

¹Bildad Suah mi in a dawng a, hichi in a chi a:

²“Thute zong a bang tan thangkam ding na hi ua? Ngaihtuah in, huaizoh chiang in ka pau ding uh.

³Bangdia gamsa bang a sim a om a, na mitmuh ua sianglou ka hi ua?

⁴Nang na hehna kipumpei ziak in lei mangngilh in a om diam? Ahihkeileh a mun a kipan in suangpi suankhiak in a om diam?

⁵“Ahi, migilou vakna mih sak in a om ding a, a mei ek a tang kei ding.

⁶A puanin ah vakna a mial dia, a tung a khawnvak mihsak ahi ding.

⁷A hatna kalsuante a hih tuailuai ahi dia, amah thupha gen in a paikhe ding hi.

⁸Amah khe mahmah in len sung ah amah a pailut ua, len ah a awksak hi.

⁹Thang in a khetul ah a man dia, thang in amah a len ding hi.

¹⁰Lei ah amah ading in thangkual sel in a om a, lampi ah amah adin thang.

¹¹Kihtakhuaite’n ning chiteng ah amah a lausak dia, a khetul ah a delhzui ding hi.

¹²A hatna gilkial nek in a om dia, tuahsiatna a khawlna ding in mansa in a om ding.

¹³A pumpi hiangte a negai ding a, ahi, a hiangte sihna ta masapen in a negai ding hi..

¹⁴A suan a puanin a kipan zungkalh khiak in a om dia lauhuainate kumpipa kiang a pi in a om ding hi.

¹⁵Amah a hilou a puanin ah teng a om ding: a tenna ah kat thehzak in a om ding hi.

¹⁶Nuailam ah a zungte a keu dia, tunglam ah a hiang sat khiak ahi ding.

¹⁷Lei a kipan in a theihgige a mangthang ding; kongzing ah min a neikei ding.

¹⁸Khovak a kipan in khomial ah hawllut ahi ding a, khovel a kipan a delh khiak.

¹⁹A mite lak ah tapa a neikei dia, tute leng: a tenna ah kuamah omlai a omkei ding hi.

²⁰A malam a omte’n a ni lamdang a sa ding ua, nunglam a omte hihlau a a om bang un.

²¹Huchibang midiktatloute tennate ahi petmah a, Pathian theilou mi mun ahi hi.”