Read Paite Chin JOB 19 Bible Online

JOB 19 - Paite Chin bible

JOB 19

¹Huchi in Job in a dawng a, hichi in a chi hi:

²“Bang tan ka kha hihbuai a, thute a hon hihzan gawp ding na hi ua?

³Hiai Sawmvei n’on kouta ua: ka tung a gilou tak a na hih uh na zum kei ua.

⁴Nana paikhialta leng maw, keimah kiang a ka diklouhna om gige hi.

⁵Kei dem in nou kiliansak petmah ve nuchin, ka minsiatna ka tung ah na gen ding uh a,

⁶Pathian in ka thu ah hon zouta chih tuin thei un, huchi in a len in a hon umsuak hi.

⁷Ngai un, Hiamgamna, chi in ka kikou khia a, himahleh zak in ka omkei: panpih deih in ka kikou a, himahleh vaihawmna a omkei hi.

⁸Ka pai theihlouhna ding in ka lampi a um a, ka paina ding te ah khomial a koih hi.

⁹Ka thupina hon suahsak a, ka lu a kipan lallukhu a lakhia hi.

¹⁰Ning chiteng ah a hon hihniam a, ka mangta hi: huchi in sing bang in ka lametna a bot khia hi.

¹¹Ka tung ah a hehna leng a sou a, amah ading in a galte lak a khat bang in a honsim hi.

¹²A sepaihpawlte a hong kuan khawm ua, ka siatna ding in a lampi uh a bawl uh ka puanin kimvel in puanin a kai uhi.

¹³“Kei apan in ka unaute gamlapi ah a koih a, ka meltheihte kei apan in a tuam vekta uh.

¹⁴Ka tanaute’n a hon zuausan ua, ka lawm theihngeite’n a hon mang ngilhta uhi.

¹⁵Ka inn tengte leh, ka sikhanute’n, mikhual a honsa ua: a mitmuh un namdangmi ka hi.

¹⁶Ka sikha ka sam a, a hon dawng kei, ka kam in amah khem mah leng.

¹⁷Ka hu ka zi ading in kihhuai a hi a, sanggamte ziak in pumpi hasiang mah le'ng ka namsia hi.

¹⁸Naupang neute nangawn in hon simmawh ua; ka thoh leh, ka siatna ding in thu a gen uhi.

¹⁹Ka lawm thudotte’n kei a honhua ua: amau ka itte ka tung ah a hel uhi.

²⁰Ka guh ka vun ah leh ka sa ah a belh bikbek a, ka ha vun toh ka suakta hi.

²¹Hon hehpih un, hon hehpih un, Aw nou ka lawmte; Pathian khut in kei a hon khoihta ngal a.

²²Bangdia Pathian bang a nou hon sawi na hi ua, ka sa a bangdia lungkim lou na hi ua?

²³“Aw ka thute tuin gelh in om le uh aw; Aw laibu ah kigelh lut le aw;

²⁴Sik leh ngen gelhna zum in tangtawn ading in suangpi a gelh hile uh aw;

²⁵Ka Tanpa a hing chih leh, a tawp chiang in leitung ah a ding nawn ding chih ka theih ziak in:

²⁶Ka vun huchibang a hihsiat a a om khitnung in, himahleh ka sa a kipan Pathian ka mu ding hi:

²⁷Keimah ading in amah keimah mah in ka mu dia, ka mitte’n a en dia, midang hilou in. Ka sung ah ka lungtang a sidangta hi!

²⁸Amah bangchibang in i sawita phet di uam, na chih uleh, kei ah thu bul muh in a om chih thei in;

²⁹Namsau kihta un: hehna in lah namsau gawtnate a hontun ngal a, huchi a vaihawmna a om chih na theihtheihna ding un.”