Read Paite Chin JOB 2 Bible Online

JOB 2 - Paite Chin bible

JOB 2

¹TOUPA Pathian tapate a hong kilak ni uh a om nawn a, huan TOUPA ma a kilak ding in a lak uah Setan leng a hongpai sam hi.

²TOUPA’N Setan kiang ah, “Koi a hong kipan na hia?” a chi hi. Setan in TOUPA a dawng a, “Lei langkhat langkhat ton a, asung a touvak a sukvak ka hi” a chi hi.

³Huan TOUPA’N Setan kiang ah, “Ka sikha Job na ngaihtuah ngei hia? Amah bang a hoihkim leh mitang, Pathian kihta a hoihlou mudah lei ah lah kuamah a om ngalkei a: amah siatna ding in hon tangsak mahle chin, a ginomna a len chinten hi” a chi hi.

⁴Setan in TOUPA a dawng a, “Vun sik in vun, ahi, mihing in a neih tengteng hinna sik in a pe ding hi.

⁵Himahleh tuin na khut kha inla, a guh leh a sa khoih lechin, na maitang ah nang hon gense ding hi” a chi hi.

⁶TOUPA’N Setan kiang ah, “Ngai in, Amah na khut ah a om hi; a hinna leltak hawi in” a chi hi.

⁷Huchi in TOUPA ma a kipan in Setan a pawtkhia a, meima tum in a khepek nuai a kipan a luzang tan in Job a gawt hi.

⁸Huchi in aman kikhuatna din belpei a la a; meivu lak ah a tu hi.

⁹Huailai in a zi in a kiang ah, “Na ginomna len chinten lailai na hi hia? Pathian gensia inla, si in” a chi hi.

¹⁰Himahleh a kiang ah, “Numei hai thugente lak a khat bang in thu na gen. Bang ahia? Pathian khut ah hoih i mu dia, hoihlou leng i mu kei dia hia?” a chi a. Hiai tengteng ah Job in a muk in thil a hihkhial kei hi.

¹¹Huchi a Job lawm thumte’n a tung a hiai hoihlou hongtung tengteng a zak un, michih amah mun a kipan in a hong ua: Eliphaz, Teman mi, Bildad Suah mi leh Zophar Naaman mi: amah kah ding leh amah lungmuan ding in hoh khawm ding in thuseh a bawl uhi.

¹²Huchi in gamlapi apan a daktouh uleh, amah a theikei ua, nakpi’n a kikou khia ua, a kapta uhi; a puanaktual uh michih in a botkek ua, a lutang uah vanlam ah leivui a kibuak uhi.

¹³Huchi in a kiang ah leitung ah ni sagih leh zan sagih a tu ua, a kiang ah kuamah in thu khat leng a gen kei uh: a lungkhamna a thupi mahmah chih a thei uhi.