Read Paite Chin JOB 20 Bible Online

JOB 20 - Paite Chin bible

JOB 20

¹Huan Zophar Naamathmi in a dawng a, hichi in a chi hi:

²Huaiziak in ka ngaihtuahnate’n kei dawnna a honpia a, ka sung a om ka kinohna thu ziak mahmah in.

³Kei hon zahlaksak salhna ka zata a, ka theihsiamna kha in a hon dawng hi.

⁴Lei tung a mihing a om nungsiah, hun lui thu hiai na theikei maw;

⁵Giloute vualzohna a tom a, Pathian limsakloute nuamsakna mitphiat kal sunglel ahi chih?

⁶A hoihkimna in vante suntou in, a lu in meipite phatou mahleh;

⁷Himahleh amah ek bang in tangtawn in a mangthang ding a, Koi a om ahia? Amah mute’n a chi ding uh.

⁸Mang bang in a lengmang dia, muh in a omkei ding hi: ahi, zan mengmuh bang a hawlmang in a om ding hi.

⁹Amah mu mit in amah a muta kei ding hi; a mun in leng amah a muta kei ding hi.

¹⁰A tate’n gentheite huhna a zong ding ua, a khutte’n a thil hoih a pe nawn ding hi.

¹¹A guhte a tuailai khelhna in a dim a, ah amah toh a lum ding uhi.

¹²Gitlouhna a kam ah khum in a lei nuai ah sel mahleh;

¹³Sit in, paisak kei in, a kam ah kem gige zou mahleh;

¹⁴A gil a an kha in a a kitok a, asung a gulgu bang in a kha hi.

¹⁵Hauhsaknate a nawmvalh a, a lawkhe nawn ding hi: Pathian in a gilpi a kipan in a paikhe ding hi.

¹⁶Khuai gu a tep dia: gul lei in amah a that ding.

¹⁷Luipite, khuaizu leh nawitui dat lui luangte a en kei ding hi.

¹⁸Sepgim gah a pe nawn dia a nawmvalh suk kei ding hi; a muhsa ah kipahna a neikei ding.

¹⁹Aman lah gentheite a nuaisiah a, a mangngilh hi; a lam louhpi inn hiamgam tak in a lata uhi.

²⁰“A deihgawlna in huntawk a neikei a a kipahpih thil himhim a khol kei ding.

²¹A nekgaih louh bangmah omlai a omkei hi; huaiziak in a hauhna in a daih sawt kei ding.

²²A hauh san lai in haksa sakna a nei dia: Thulimlou mi khut a hongtung ding a,

²³A gilpi hihdim ding a a kisaklai in, Pathian in a tung ah a thangpaihna kihtakhuaina a khe ding a, a nek lai in a tung ah a zusak ding hi.

²⁴Sik galvan a kipan a tai dia, dal thal in amah a kap pailet ding.

²⁵A dokkhia a, a pumpi a kipan in a hong paikhia: ahi a sinkha apat a mukzum tevelvel hong paikhia a launate a tung ah a hongtung hi.

²⁶A gou ding in mialna tengteng kholkhawm in a om: mei mutlouh in amah a negai ding; a puanin a nutsiat a om a negai ding hi.

²⁷Vante’n a bohsiatna a taklang ding ua, lei amah dou ding in a thou ding.

²⁸A inn a punna a paimang dia, a hehni in a vante a luang mang ding hi.

²⁹Hiai Pathian apan a migilou tantuan ahi, a gouluah dia Pathian in a sehsak.