Read Paite Chin JOB 21 Bible Online

JOB 21 - Paite Chin bible

JOB 21

¹Job in a dawng a, hichi in a chi hi:

²“Ka thugen hoihtak in ngaikhia unla, hiai na khamuanna thu uh hi hen.

³Honthuak teitei unla, ka hon gen ding a, ka gen khit chiang in nuihsan na nu teh.

⁴Kei phunna mihing tung ah hia? Bangdia kuhkallou a omlou ding ka hia?

⁵Hon en unla, lamdang sa unla, khut in na kam uh hum un.

⁶Ka ngaihtuah in ka lung a dong a, linna in ka sa a man nak.

⁷Bangziak in ahia migilou a hin a, tekkun a a dam a, a hong thupikhiak?

⁸A suante uh a kiang uah a mitmuh uah a hihkip a, a gil ua gahte a mai ma uh.

⁹A inn leh loute uh lauhuai lak ah a bit a, Pathian chiang a tung uah a ke kei hi.

¹⁰A bawngtal un chi a khah a, a hut ngeikei, a bawngpi un nou a nei a, a nou a se ngeikei.

¹¹Ganhon bang in a taneute uh a pawtsak ua, a tate uh a lam uh.

¹²A pekging uleh kaihging toh kituak in la a sa ua, a tamngai ging uah a kipak uh.

¹³A nite uh lamzangtak in a zang ua, lungmuang in Sheol ah a paisuk uh.

¹⁴Pathian kiang ah, Hon paisan in, na lampite theih ka kilawp kei uh.

¹⁵Bangkim hihthei bang a a hih, a na ka sep ding uh, A kiang a ka thum un punna bang a ka muh ding uh? a chi uhi.

¹⁶Ngai in; a lamzanna uh a khut ua om ahi kei ahia? Migilou lemtheihna kei a kipan a gamlapi a om ahi.

¹⁷“Migilou meisel bangzah vei a mit a, vangtahna a tung ua a tun a, Pathian in a thangpaihna in lungkhamna a piak chiat?

¹⁸Bangzah vei ahia buhpawl huih mut bang a hih ua, buhsi huihpi mutmang bang a hih uh?

¹⁹Pathian in gitlouhnate a tate uh ading in a kholkhawm, na chi ua, amau tung ah tungsak le ake, a theihsiam nading un.

²⁰Amau mit ngei in a siatna uh mu uhenla, Bangkim hihthei thangpaihna dawn uhen.

²¹Aman nung in a inn uh amau adin bang a a hih, a kha zah uh hihtawp a hih nung in?

²²Kuan ahia Pathian theihna sinsak ding? aman sangpi a omte vai a hawmsak ngal a.

²³A lutlai in mi a si a, nuam leh bit lai in.

²⁴A nawite nawizu in a dim a, a guhngekte thau in a dim hi.

²⁵Midang lungkhamtak in a si a, Nuamsa a a an chiam ngeilou in.

²⁶Vutlak ah kibang in a lum ua, than in a pumtuam hi.

²⁷“Ngai in, na ngaihtuah uh ka thei, dikloupi a ka tung a na sawmte uh.

²⁸Koi ah ahia kumpi in a om, migilou tenna puanin koi ah a om a? na chi uh.

²⁹Zinzin mite na dong ngeikei ua hia? A gente uh na pom kei ua hia?

³⁰Migilou vangtah ni’n hawi in a om a, thangpaih ni’n hotkhiak in a om, chih.

³¹Kua ahia a maitang a a lampi pulak ding, kua ahia a thilhih bang a amah din ding?

³²Han lam a puak a hih in, a han ven ahi.

³³Luiguam a leitang amah din a nuam a; mi tengteng in amah nung a zui ua, amah ma a na paite simsenglouh ahi uh.

³⁴Bangchi in thu mulmal omloupi in hon khamuan ding na hia? Na dawnnate uah zuauthu loungal bangmah a omkei hi.”