Read Paite Chin JOB 22 Bible Online

JOB 22 - Paite Chin bible

JOB 22

¹Huchi in Eliphaz, Teman mi in hichi in a chi hi;

²“Mihing Pathian ading in a phatuam thei diam? Kuapeuh a pil amah mah ading in a phatuam ngei a.

³Na diktat, Thilbangkim hihthei ading a kipahna ahi ahia? Ahihkeileh na lampite na hoihkim sak, amah dia punna hia?

⁴Nang a honsalh a, vaihawmna a nang toh a lut, amah na kihtak ziak hia?

⁵Na gitlouhna a lian kei maw? Na thulimlouhna ah leng tawpna a omsam kei hi.

⁶Bangmahlou ding in na unau thuchiamte na la a, vuaktangte a puansilh uh na suahsak hi.

⁷Gim a in dawn ding in tui na pe kei a, gilkial adin tanghou na it hi.

⁸Himahleh mi hat in gam a nei a; mi deihthoh a ung ah a teng hi.

⁹Khutvuak in meithaite na sawl mang a, pabeite khutte hihtan in a om hi.

¹⁰Huaiziak in thangte na kim ah a om ua, lau guihna in nang hon hihbuai hi.

¹¹Ahihkeileh khomial, na muhtheih louh, leh tui tampi in nang a honkhuh hi.

¹²“Van sang ah Pathian a om ka hia? Aksite sandan en in, sang hina tel uh e;

¹³Nang, Pathian in bang a thei a? Khomial bikbek ah vai a hawm thei dia hia?

¹⁴Aman hon muhlouhna dinga, meipi sah in liah a, van dum khen a a vak ahi, na chi.

¹⁵Migiloute totsa lampi lui na kem ding hia?

¹⁶A hun ma ua lakmang a om a, a kingakna ua tuiluang bang a butkhiak a omte:

¹⁷Pathian kiang a, Hon pai mangsan in; huan ei ading in Thilbangkim hihthei in bang a hih thei a? chite.

¹⁸Himahleh a innte uh thil hoih in a dimsak ua: himahleh migiloute thugen kei a kipan a gamla hi.

¹⁹Mi diktatte’n a mu ua, a kipak ua; mi hoihte’n amau a nuihsan ua,

²⁰Chihtaktak in ei dou ding a thoute satkhiak in a om ua, amaute lak a omlaite mei in a hulta, chi in.

²¹“Tuin amah kimeltheihpih inla, muangtakin om in: Huai ah hoih na kiang ah a hongpai ding hi.

²²A kam a kipan in dan sang in, k’on ngen hi, na lungtang ah a thute khol khawm in.

²³Thilbangkim hihthei kiang a na kiknawn leh, lamkip na hi ding; Na puaninte a kipan a gamlapi a diktatlouhna na koihmang ding ahi.

²⁴Huan na gou leivui ah koih inla, luite suangte lak ah Ophir dangkaeng;

²⁵Thilbangkim hihthei na gou ahi dia, a manpha dangka nang a ding in

²⁶Thilbangkim hihthei ah kipak in, Pathian kiang ah daktou ding na hih ziak in.

²⁷Amah kiang ah na thum ding a, aman a honza ding hi.

²⁸Thil khat tung ah thupukna bawl in thu na pedia, nang adia hihkip in a om ding hi; huchi in na lampite ah khovak a tang ding.

²⁹A hon sawnpuk chiang un, Thoh touhna a om, na chi ding; Hihniam a omte aman a hondam ding hi.

³⁰Aman a hoihlou nasan a suaktasak ding a: ahi, na khutte sianna ziak in amah suahtaksak in a om ding.”