Read Paite Chin JOB 23 Bible Online

JOB 23 - Paite Chin bible

JOB 23

¹Huchi in Job in a dawng a, hichi in a chi hi:

²Tuni mahmah in ka phunna helhuai ahi: ka thuakna ka mauna sang in a gikzaw hi.

³Aw amah ka muhna mun thei lengla, a tutna mahmah ah hoh thei leng aw!

⁴A ma ah ka thu ka bawlhoih dia, thugente in ka kam dimsak ding hi veng.

⁵A hon na dawnna ding thute ka thei dia, huchi in bang ahia ka kiang a a gen ding ka theisiam ding.

⁶A thilhihtheihna letna in kei a honsel diam? Ii; himahleh kei a hon limsak ding hi.

⁷Huai ah midik in amah thu a sutpih thei dia; huchi in ka vaihawmmi apan suahtaksak in ka omtawntungta ding hi.

⁸“Ngai in, mailam zuan in ka pai a, himahleh huai ah a omkei; nunglam zuan in, himahleh amah ka mu kei hi.

⁹Veilam pang ah, na sep lai in, himahleh amah ka mu theikei a: taklam pang ah a bu, amah ka muh theihlouhna ding in.

¹⁰Himahleh ka zuih lampi a thei a; a hon ze-et lai in, dangkaeng bang in k’on suakkhe ding hi.

¹¹Ka khe in a kalsuante a len kip a; a lampite ka zuita a, ka pial kei hi.

¹²A mukte thupiak a kipan ka pai kik kei a, a kam a thute a kiphamoh ka an sang in ka kholkhawm zaw hi.

¹³Himahleh amah lungsim kheklou ahi a, amah kuan a hei thei dia? A kha in a deih, huai mah ahihzel hi.

¹⁴Kei adia sehsa a hih ngal a: thil huchibang tampi a kiang ah a om hi.

¹⁵Huaiziak in a omna ah ka buai a; ka ngaihtuah chiang in amah ka lau hi.

¹⁶Pathian in ka lungtang a bahsakta a, Thilbangkim hihthei in a hon hihbuaita hi.

¹⁷Khomial ma in satkhiak in ka om ngal kei a, ka mai a kipan khomial sah leng a khuh sam kei hi.”