Read Paite Chin JOB 24 Bible Online

JOB 24 - Paite Chin bible

JOB 24

¹Bangdia Thilbang kimhihthei in vaihawmna hunte bawl lou ahia? Amah theite’n bangdia a nite mulou uh ahia?

²Gamgi suan a om ua; ganhon hiamgam tak in a lamang ua, a vak uhi.

³Pabeite sabiltung a hawl mang ua: thuchiamna din meithai bawngtal a la uh.

⁴Lampi a kipan tasamte a hei khia ua: lei a gentheite a kisel khawm uhi.

⁵Ngai in gamkeu a sabiltungte bang in a thilhihna lam uah, an thanuamtak a zong in a paikhia ua, a tate uh ding in gamdai in amau an a suaksak hi.

⁶Gam lam ah a gan an a at ua; migiloute grep gah a la uh.

⁷Zankhua in puan bei in vuaktang in a lum ua, khovot ah khuhna neilou in.

⁸Mualte vuahphin in a kawt ua, belhding deihman in suangpi a kawi uhi.

⁹“Pa neiloute nawi a kipan kai khia a om ua, huan gentheite thuchiam la:

¹⁰Huchi in tasamte puanbei in vuaktang in a vialvak ua, buhphalte gilkial in a pua uhi.

¹¹Olive apan sathau a bawl ua; a uain sukna uh a chil ua, himahleh a dangtak uhi.

¹²Khopi a kipan mite a mau ua, liamte kha a kikou khia ua; Pathian in a limsak kei hi.

¹³“Hiaite khovak tung a helte lak a ahi ua; huai lampite a theikei ua, a lampite ah a om gige sam kei uhi.

¹⁴Tualthatmi zan mial in a thou a, gentheite leh tasamte a that a; ahi, zan in gutami ahi.

¹⁵Angkawm mi mit in leng khomui a ngak a, kuamah in honmu kei ding, chi in, a mai a bawl lamdang hi.

¹⁶Khomial in innte a vut pailet ua: sun chiang in a kikhum bilh ua; khovak a theikei uh.

¹⁷Amaute tengteng ading in zingsang sihna limliap bang ahi a; zan mial lauhuaite lawm in a nei uhi.

¹⁸“Tuite tung ah kintak a taihmang in a om ua; a tantuan uh lei ah hamsiat in a om: a grephuante sukmi in a naih kei.

¹⁹Khokhal leh nisa in vuk tuite a tawpkang a: huai mah bang in thil hihkhialte Sheol in a hih hi.

²⁰Sul in amah a mangngilh dia; than in limsatakin amah kivakna in a nei ding uh; theihgige in a omta kei dia, diktatlouhna sing bang a hihtan in a om ding.

²¹“Ta neilou numei ching a negai a; meithai ading in hoih a hih kei hi.

²²Ahi a lah Pathian in a thilhihtheihna in mihatte a dawmkang a, hinna a lamet phaklouh lai un a dingtou uh.

²³Bitna Pathian in amau a pia a, huchi in huai ah a khawl uh; a mitte a lampite uah a om hi.

²⁴Hihlet in a om ua; himahleh sawtlou kal in, a bei uhi; ahi, sukniam in a om ua, midang tengteng bang in lampi a kipan lak khiak in a om ua, buhvui bang a at khiak in a om uhi.

²⁵Huchibang na hi kei ta leh kua ahia zuauthei a hon chian ding a, ka thugen ah bangmah omlou a lak ding?”