Read Paite Chin JOB 27 Bible Online

JOB 27 - Paite Chin bible

JOB 27

¹Huchi in Job in a gentehna thu apan nawn a, hichi in a chi hi:

²“Pathian a hing bang in, aman ka dikna a lamang a; Thilbangkim hihthei in, aman ka kha a hihbuai a;

³Ka hinna ka sung a a om laiteng, Pathian hu ka nakvang a a om laiteng?

⁴Ka mukte’n thutaklou a gen kei ding, ka lei in leng khemna thu a gen kei ding.

⁵Siam k’on tangsak kei ding hi: ka sihma ka dikna kei a pan ka koihmang kei ding hi.

⁶Ka diktatna ka len chinten a, ka khah kei ding hi: ka damlai teng ka lungtang in kei honkou kei ding.

⁷“Ka melma gilou bang hi henla, kei dou dia thou mi diktatlou bang hi hen.

⁸Punna muta mahleh, Pathian limsakloumi lametna, Pathian in a kha a lakmang ngal in, bang ahia?

⁹A tung a buaina a tun in, a kikou Pathian in a za diam?

¹⁰Thilbangkim hihthei ah nuam a sa in, Chiklaipeuh in Pathian sap nuam a sa diam?

¹¹Pathian khut tungtang ah nang k’on sinsak ding; Thilbangkim hihthei kiang a om ken ka im kei ding hi.

¹²Ngai un, noute tengteng in huai na muta ua; A hih ngal leh, bangdia bangmahlou honghi na hi ua?

¹³“Hiai Pathian lak a migilou tantuan leh, nuaisiahhat mite goutan, Thilbangkim hihthei apan a muh uh ahi.

¹⁴A tate a pun uleh, namsau ading ahi; huan a suan tanghou in a tai kei ding hi.

¹⁵A nung a omlaite hi leng in a vui dia, a meithaite un kahna a bawl kei ding uh.

¹⁶Dangka leivui bang in vum in, puansilh tungman bang in bawl mahleh;

¹⁷A bawl thei, himahleh midikte’n a silh ding ua, mi hoihte’n dangka pen a hawm ding uhi.

¹⁸Inn a lam maimom len bang ahi a, vengmi in a bawl aidakbuk bang ahi.

¹⁹Hausa in a lum a, himahleh khop in a omkei ding; a mit a hak a, huan a omkei.

²⁰Tuite bang in launate’n amah a pha a; zan in huihpi in amah a gu mang hi.

²¹Suahlam huih in amah a pawmang a, a pai mang hi; huchi in a mun a kipan in amah a mut mang hi

²²Pathian in amah nakpi’n a lawn dia, a dawm kei ding: a khut a pan a taimang ding hi.

²³Mite’n amah a khut uh a betkhum ding ua, a mun a kipan in amah a nuihsan khe ding uhi.”