Read Paite Chin JOB 28 Bible Online

JOB 28 - Paite Chin bible

JOB 28

¹Chihtaktak in dangka ading in khuk a om a, a hihsiang uh dangkaeng ading in mun.

²Lei a pan in sik a kilakhia a, suang a kipan in dal a ki sungkhia hi.

³Mihing in khomial phaktawp a neisak a, khomial sah leh thuk ah phaktawp gamlapen tan in sikbu a zongkhia.

⁴Mite om louhna ah kawkhuk lutna hawm a tou vang ua, mite apat gamla ah a kikhai ua, Lehlam lehlam ah a ki vei uh.

⁵Lei ahihleh, huai a kipan in tanghou a hongsuak a: a nuai ah mei a hihbang in a kilumlet hi.

⁶Huai suangte sapphir suang mun ahi a dangkaeng nen a nei hi.

⁷“Huai lampi sasial ne vasa in a theikei a, mu akla mit in leng a mu ngei sam kei hi.

⁸Gamsa kisatheite’n a sikkha ngeikei ua, humpinelkai lunlai leng huai ah a paikha naikei hi.

⁹“Meisah suangpi tung ah a khut a koih a; a zung in mualte a lumlet a lumlet hi.

¹⁰Suangpite lak ah tuilam a hong a; a mit in thil manpha chiteng a mu hi.

¹¹A takkhiak louhna ding un lui luangte a tuam a; thil kisel khovak ah a hon lakhia hi.

¹²“Himahleh koilai ah a pilna a kimu dia? Theihsiamna koilai a om ahia?

¹³Mihing in a lampi a theikei hi; mihing gam ah leng muh in a omkei hi.

¹⁴Thukna in kei ah a omkei a chi a, Tuipi in, ka kiang ah a omkei, a chi hi.

¹⁵Dangkaeng a muhtheih ahi kei a, huai man ding in dangka buk theih ahi kei hi.

¹⁶Ophir dangkaeng toh a manphatna teh theih ahi kei ding, Onik mantam hiam Sapphir toh hiam.

¹⁷Dangkaeng leh limlang in a kimpih theikei ua: huai khenna din dangkaeng hoih leh suangmantam leng ahi theikei ding hi.

¹⁸Suang dum hiam suang muh paisuak theih a kigen kei ding: Ahi, pilna man rubi suang sang in a sangzaw hi.

¹⁹Ethiopia topaz suang in a pha kei dia, dangkaeng tak toh leng a manphatna teh ding ahi kei.

²⁰“Ahihleh pilna koi a kipan a hongpai ahia? Theihsiamna koi a om hia?

²¹Mihing tengteng mit a kipan a sel ahi chih leh, huihkhua a vasate a kipan sitsa a om ahi chih thei in.

²²Abaddon leh Sihna in, huai a thuthang ka bil un ka za uh, a chi uhi.

²³“Huai a lampi Pathian in a theisiam, huai a mun a thei hi.

²⁴Lei mong tan in a en ngal a, van nuai thil tengteng a mu hi.

²⁵Huih ading a gikna a piaklai in, leh tuite tehna a a teh lai in;

²⁶Vuah ading a thupiak a bawl a, vanpiging khophia adia lampi a bawl lai in;

²⁷Huailai in aman a mu a, a phuang a; a hihkip a, ahi, a zongkhia hi.

²⁸Mihing kiang ah, Ngai in, TOUPA kihtak, pilna ahi: hoihlou a kipan paimang theihsiamna ahi, a chi hi.”