Read Paite Chin JOB 29 Bible Online

JOB 29 - Paite Chin bible

JOB 29

¹Job in a gentehna thu a gen nawn a, hichi in a chi hi:

²“Aw nidanglai khate bang a om hileng, Pathian in a honveh lai nite bang in;

³Ka lu tung a a khawnvak a tan a, amah vakna a khomial a ka vak lai;

⁴Ka hoihlai nite a ka om bang a, ka puanin tung a Pathian thuguk a omlai in;

⁵Ka kiang a Thilbangkim hihthei a om a, ka tate ka kim a omlai un;

⁶Ka kalsuante bawngnawi a sawp a hih a, suangpin sathau luite a butkhiaklai in:

⁷Khopi a kongpi zuan a ka pailai in, kongzing a ka tutna ka bawl lai in,

⁸Tangvalte’n a honmu ua, a bu ua: upate a thou ua ading uh:

⁹Lalte houlim a kidek ua, a kam uah a khut uh a koih uh:

¹⁰Miliante aw a dai a, a lei uh a kam dangtawng uah a belh hi.

¹¹Bil in a honzak lai in, hampha a honchi a; mit in a honmuh lai in, pom a honchi a;

¹²A kap mi genthei, amah panpih a, Pa neilou, panpih bei ka hutkhiak ziak in.

¹³Mangthang ding a mansa a kipan vualzawlna ka tung ah a hongtung a: meithai lungtang kipah ziak a lasa ding in ka omsak hi.

¹⁴Diktatna ka silh a, a hontuam hi: ka dikna puanak thupi leh lukhum bang leh suangmantam bang ahi.

¹⁵Mittaw ading in mitte ka hi a, khebai ading in khete ka hi.

¹⁶Tasam ading in pa ka hi a: ka theihlouh thubul ka zongkhia hi.

¹⁷Diktatlou mi haizek ka hihtan a, a ha a kipan a samat ka khahsak.

¹⁸Huchi in ken, ka bu ah ka si ding a, piaunel bang in ka nite ka pungsak ding, ka chi a:

¹⁹Ka zungte tuite pha in a dalh zak a, ka hiang ah zankhua in daitui a kai:

²⁰Kei ah ka thupina a thak gige a, ka khut ah ka thalpeu a thak gige.

²¹“Mite’n a honngai ua, a ngak ua, ka thuhilh ading in a daidide uhi.

²²Ka thute zoh in a pau nawn kei uh; ka thugen a tung uah a takkhia.

²³Vuah ngak bang in a hon ngak ua; vuah nanungte ading bang in lianpi in a kam ka uh.

²⁴Kimuanna a neih louh chiang un a tung uah ka nuihmai a; huchi in ka mel tang a paikhe kei uh.

²⁵A lampi ding uh ka telsak a, hausa bang in ka tu a; sepaihpawl lak a kumpipa bang in ka leng a, sunmite lungmuanmi bang in.”