Read Paite Chin JOB 3 Bible Online

JOB 3 - Paite Chin bible

JOB 3

¹Hiai khit in Job in a kam a ka a, a ni a hamsiat hi.

²Job in a dawng a hichi in a chi hi:

³“Ka pian ni leh zan, pasal naupang pai in a om, a kichihna mangthang hen.

⁴Huai ni mialna hi hen; tunglam a kipan Pathian in ngaihsak kei hen, a tung ah leng khovak tang kei hen.

⁵Khomial leh sihna lim in amau ading in huai ngen uhen; a tung ah meipi kai hen; khua nimsak tengteng in huai tuh lausak uhen.

⁶Zan ahihleh, mial sah bikbek a tung ah tu hen; kum nite lak ah kipak kei hen; khate simna ah tel kei heh.

⁷Ngai in, huai zan hut hen; huai ah kipah aw ging kei hen.

⁸Huai ni hamsiatte amau hamsiat uhen, Leviathan tokthou ding a mansa a omte.

⁹Huai a khomui aksite mial uhen: khovak zong henla, himahleh bangmah neikei hen; zingsang mitvunte leng musam kei hen:

¹⁰Ka nu sul kongkhakte a khaklouh ziak in, ka mit a kipan a buaina a sel louh ziak in.

¹¹Sul a kipan bangdia silou ka hia? Gila kipan ka hong paikhiak lai a bangdia kha khahlou ka hia?

¹²Bangdia khukte’n kei hondom ahia? Ahihkeileh bangdia ka tep ding nawi na om ahia?

¹³Tuchiang in na lumkhin a, na daimai ding lah ka hi ngal a; ka na ihmuta dia; huchi in ka na khawlta ding hi:

¹⁴Lei kumpipate leh thudotmite, amau ading a mun siate bawlte toh;

¹⁵Ahihkeileh dangkaeng nei kumpite, a innte uh dangka a dimsakte toh;

¹⁶Ahihkeileh muhlouh a a hunlou a piang bang na hilou ka hia, naungek khovak mu ngeiloute bang?

¹⁷Huai ah migiloute’n sukbuai a tawpsan ua; huai ah mitawlte a khawl uhi.

¹⁸Huai ah salmatte nuam in a omkhawm uh; nasem heutute aw a za kei uhi.

¹⁹Huai ah a lian leh a neu a om ua; a pu a kipan in sikha a nuamlen.

²⁰Bangdia dah a omte kiang a khovak piak ahia, kha a haksa sa kiang ah hinna;

²¹Sihna deih a, a tunlouhnate kiang ah; gou selguk zon sang a thupi a zongmite kiang ah;

²²Han a tunlai ua, nakpitak a kipakte kiang ah?

²³Bangdia mi a lampi sel a om kiang leh Pathian in a umsuak kiang a khovak piak a om ahia?

²⁴Ka thumna an ka nek ma in a hongtung a, ka maunate tui bang a leihbuak in a om hi.

²⁵Ka kihtak thil lah ka tung ah a hongtung ngal a, ka laulau ka tung ah a hongtung hi.

²⁶Nuam ka sa kei a, ka lung a muang kei, khawlna leng ka neikei hi; himahleh buaina a hongpai hi.”