Read Paite Chin JOB 30 Bible Online

JOB 30 - Paite Chin bible

JOB 30

¹“Huan kei sang a naupang, a pate uh, ka ganching uite toh koih dia ka sitte’n, kei nuihzabawlna in a hon zang uh.

²Ahi, a khutte uh hat a, kei bang a hon lohtak dia, huai a hatna uh beisate’n?

³Taksapna leh kialna in a tuikang ua; lei keu leh sia a kheuh uh,

⁴Pawn a anteh a lou ua; huan loukha zungte a an uh ahi.

⁵Mite lak a kipan hawlkhiak in a om ua; guta bang in amau nung ah a kikou ua.

⁶Guam a hengte ah a teng ding ua, lei leh suangpi hawmte ah.

⁷Pawn lak ah a ham ua; lahou nuaite ah a kisekhawm uh.

⁸Mihaite tate ahi ua, ahi, mi thulimlou tate; gam a pan in delhkhiak ahi uhi.

⁹“Huan tuin kei a la uh ka honghi ahi, amau ading in houlimna ka hi.

¹⁰A honkih ua, kei a kipan a tuam din uh, ka mai a chil siat a kidek kei uh.

¹¹Pathian in ka khau a khah a, a hon hihgim a, huan ka ma ah kamkaihna a khahkhia uh.

¹²Ka khut taklam ah tualaite a thou ua; ka khe a nawlkhin ua, siatna lampi ka ma ah a koih uhi.

¹³Ka lampi hihsia in, ka tuahsiatna a zong ua, kuama’n a kham kei uh.

¹⁴Awng zapi a paisuak bang in a hong ua: siatna lak ah ka tung ah a kikhuk uh.

¹⁵Launate ka tung ah a hei ua, huih bang in ka minphatna a delhmang uh; meipi bang in ka hauhna a paimang hi.

¹⁶“Huchi in tuin ka sung ah ka kha buakkhiak in a om; gimthuakna nite’n kei a honman uhi.

¹⁷Zan in ka guhte a sawi a, kei honsun natnate’n khawl chih a neikei uh.

¹⁸Ka natna hi hat mahmahna ziak in ka puansilh a nin a: ka puanak ngawng bang in kei a hon gak hi.

¹⁹Buannawi ah a honpai lut a, leivui leh meivu bang ka hi hi.

²⁰Na kiang ah ka kikou a, n’on dawng kei hi: Ka ding a, kei n’on en maimah a.

²¹Ka tung a gilou ding in na kilumlet a, na ban hatna in kei n’on sawi hi.

²²Huih ah n’on domkang tou a, huai tung ah n’on tuangsak; huchi in huih ah n’on lumlet let hi.

²³Sihna na hontun ding chih ka thei hi, mihing tengteng adia sehsa inn ah.

²⁴“Himahleh siatna a pukgawp mi’n a banzak lou ding hia? A tuahsiatna ah panpihna ngen in kikou lou ding hia?

²⁵Buaina a din ka kap kei diam? tasam a ding in ka kha a dah kei ding a hiam?

²⁶Hoih ka ngak chiang in, hoihlou a hongpai a; khovak ka ngak chiang in, khomial a hongpai.

²⁷Ka lungtang a buai, khawl a mu ngeikei; gimthuakna nite ka tung ah a hongtung.

²⁸Hihvom a om in ka vialvak, himahleh ni hihvom hilou in; khawmpi ah ka ding a panpih deih in ka kikou hi.

²⁹Sehalte unaupa ka hi a, vakengsangte lawm ka hi.

³⁰Ka vun a vom a, kei a kipan a pilh uh, kholum in ka guhte a kang hi.

³¹Huaiziak in ka kaihging sunna a suak a, ka mutging mikapte aw.”