Read Paite Chin JOB 31 Bible Online

JOB 31 - Paite Chin bible

JOB 31

¹“Ka mit toh thukhun ka na bawlkhinta; Bangchi’n nungak ka en theita dia?

²Ahihleh tunglam Pathian a kipan in ka tantuan bang ahia, tungsang a Thilbangkim hihthei a kipan in ka goutan?

³Mi dikloute tung ah siatna, gitlouh nasemte tung ah gawtna a tung kei maw?

⁴Aman ka lampite a mu kei ahia? ka kalsuante a sim vek kei ahia?

⁵“Thuzuau toh na om a, huai a ka khe khem ding a kinoh ahihleh;

⁶Bukna diktak ah honbuk dih ua, Pathian in ka thutakna thei hen!

⁷Ka kalsuan lampi a kipan a na pial hiam, ka lungtang in ka mitte na zui hiam, ka khutte ah nin himhim na belh hiam:

⁸Huchi ka hihleh, chi tuh ning, midang in ne hen; ahi, ka lou a piang bulkalh khiak hi hen.

⁹Ka lungtang numei lam a khem a om a, ka inveng kongkhak ka na ngaktak leh:

¹⁰Huchi a hihtak leh ka zi in midang ading in an su henla, midangte amah tung ah kun uhen.

¹¹Huchibang gitlouhna hoih hetlou ahi; ahi, vaihawmmite gawt ding khelhna ngei,

¹²Siatna ding a Abaddon tan a kangbei leh, ka punna tengteng zungkalh ding mei hi ding lah ahi ngal a.

¹³“Ka tung a phunna a neihlai ua, ka sikhapa hiam ka sikhanu hiam makhua na musit a, na khualsak lou ka hihleh;

¹⁴Pathian a thohkhiak chiang in bang ka hihta dia? Thu a kan hun chiang in bang in ka dawngta dia?

¹⁵Kei sul a hon bawlpan amah a bawl kei maw? Khat in a hon bawltuak ahi kei maw?

¹⁶“Migentheite a lunggulh uh ka piak louh a, ahihkeileh a vuaksuak ding a meithai mitte ka na omsak leh;

¹⁷Ahihkeileh kei kia in ka an ka nek a, huai a pabei in an a nek kei leh;

¹⁸Ii, ka tuailai a kipan in pa bang ka hi, ka kiang ah a na khanglianta; ka nu sul a kipan amah pipa ka hita hi:

¹⁹Kuapeuh taksap ziak a mangthang hiam, ahihkeileh tasam khuhna neilou hiam ka na muh leh;

²⁰A kongte’n kei hon vualzawl lou a, ka belam mul a lumsak a a na omkei leh;

²¹Kongpi a panpihna ka muh ziak a pabeite siatna ding a ka khut ka nalik leh;

²²Huchi ka hihleh, ka liang ka liangzang a kipan kia henla, a guh a kipan ka ban kitan hen.

²³Pathian a kipan tuahsia kei a ding in launa ahi ngal a, A thupina ka tuak ngam kei hi.

²⁴“Dangkaeng lametpen a ka na bawl a, dangkaeng hoih kiang ah, ka muanna na hi, ka na chihtak a;

²⁵Ka hauhna thupi ziak a hiam, ka khut in tam a lam ziak a ka kipah a;

²⁶A vak lai a ni ka na et a, kha thupitak paikhia ka na et a,

²⁷Ka lungtang guk a khem a a om a, ka kam in ka khut a na tawptak leh:

²⁸Hiai leng thulimlouhna vaihawmmite gawt ding ahi: tung a Pathian kiang a na zuauta hi ding ka hih ziak in.

²⁹“Kei hon mudah siatna a ka na kipah a, ahihkeileh hoihlou a tung a a tun chiang a ka na kipah luat leh;

³⁰Ka melma hamsiat ding leh a henna thum ding in ka kam ka na khialsak kei;

³¹Ka puanin a te a, A an a kihihvah lou kua a om a, hon na chih kei ua leh;

³²Kongzing ah mikhual a giak ngeikei a; khualzin adin ka kongte ka na hongta

³³Adam bang a ka angsung a thulimlouhna na sel a, ka tatlekna na khuh ka hih a,

³⁴A ziak, mi tampi launa thupitak ka neih ziak a hih a, sungte honmuh daina launa ziak a huchi a daidide a, popawt lou ka hihleh,

³⁵Aw, kei honza mi nei leng maw: Ngai in, hiai ah ka min gelh a om hi. Thilbangkim hihthei in hon dawng hen; ka gal in a gelhkhiak matna nei leng maw:

³⁶Chihtaktak in ka liangzang ah ka paw dia; lallukhu bang in kei ah ka kan den ding hi.

³⁷A kiang ah ka kal suan zah ka phuang ding a; lal bang in ka kiang nai ah ka hoh ding hi.

³⁸“Ka gam kei dem a a kikou a, lei lehsate a kah khawm uleh;

³⁹Sum lou a huai gahte ka na nektak a, ahihkeileh huai a a neite a hinna uh ka na tansak leh:

⁴⁰Buh hilou in loulingneite, barli buh hilou in loubualte pou zaw hen.” Job thute a beita hi.