Read Paite Chin JOB 32 Bible Online

JOB 32 - Paite Chin bible

JOB 32

¹Huchibang in hiai mi thumte Job dawn a tawpta ua, amah mit a diktat a hih ziak in.

²Huailai in Buz mi Barakel tapa Elihu hehna a kuangkhia a, Ram inkuan a mi: Job tung ah a hehna a kuangkhia a, Pathian hizaw lou a amah siam a kitansak ziak in.

³A lawm thumte tung ah leng a hehna a kuangkhia a, dawnna ding neilou a, hinapia lah Job a mawhpaih ziak un.

⁴Amah sang a a upat zawk ziak uh, Job kiang a thugen ding in Elihu in a ngak hi.

⁵Hiai mi thumte kam a dawnna a omkei chih a theih in, a hehna a kuangkhia hi.

⁶“Huchi in Buz mi Barakel tapa Ka naupang a, nou na upa mahmah uh; huaiziak in ka dai a, ka lungsim k’on ensak ngam kei hi.

⁷Huchi in ka chi, Nite’n thu a gen ding uh, kum tampi in pilna a sinsak ding hi.

⁸Himahleh mihing lungsim a om a, Thilbangkimthei in theihsiamna a pia hi.

⁹A pilte mi thupite ahi kei ua, vaihawmna theisiamte upate ahi sam kei uh.

¹⁰Huaiziak in, hong ngaikhia un; ken leng ka lungsim ka ensak ding, ka chi.

¹¹“Ngai un, na thute uh ka ngak a, gen ding na zonkhiak lai un, na thusutte uh ka ngaikhia.

¹²Ahi, k’on limsak a, ngai un, kuamah Job thuzoh zou na omkei uh, ahihkeileh na lak uah, a thute dawng.

¹³Pilna i muta, chilou din pilvang un; mihing hilou in Pathian in amah a zou thei hi:

¹⁴Aman kei siatna ding in a thute ahihkei a; ken leng nou thugente in amah ka dawng sam kei ding.

¹⁵“Lamdangsa in, a dawng nawn kei ua, gen ding thu khat leng a neikei uh.

¹⁶Thu ging neih louh ziak in ading kinken ua, a dawn nawnlouh ziak un ken ka ngak diam?

¹⁷Ken leng ka dawnna ding ka nei hi, ka lungsim ka ensak sam ding hi.

¹⁸Thu in ka dim a; ka sung a ka kha in honsawl teitei hi.

¹⁹Ngai un, ka gilpi pawtkhiakna neilou uain bang ahi; khuainulhaite bang in puakzak ding in mansa in a om hi.

²⁰Ka halh theihna ding in, ka pau ding; ka mukte ka hong dia, ka dawng ding hi.

²¹Mihing mihinna zahtaksak kei un, k’on ngen hi; kuamah kiang ah leng maitang phatna min ka pe kei ding hi.

²²Maitang phatna minte piak ding ka thei ngal kei a; huchilou in zaw kei hon bawlpan a hon lazok ding hi.”