Read Paite Chin JOB 33 Bible Online

JOB 33 - Paite Chin bible

JOB 33

¹“Akoi abang hileh, Job, k’on ngen hi, thugen za inla ka thugen tengteng ngaikhia in.

²Ngai in, tuni, ka kam ka ka a, ka kam in ka pau hi.

³Ka thute’n ka lungtang dikna a genkhe ding uh; Ka mukte’n a theih ngei uh chihtaktak in a gen ding uhi.

⁴Pathian Kha in a honbawl a, Thilbangkim hihthei hu in hinna honpia hi.

⁵Na theih leh, hon dawng in; ka ma ah na thute a kizom in koih inla na panna ah ding in.

⁶Ngai in, nang bang in Pathian lam ah ka om hi: keileng tungman a bawl ka hi.

⁷Ngai in, ka lauhuaina in nang a hon lausak kei ding, ka hahkatna leng na tung ah a gik kei ding hi.

⁸“Chihtaktak in ka zak in na pauta a, huchi in na thute ging ka zata hi.

⁹Ka siang hi, tatlekna bei; ka hoih a, kei ah thulimlouhna leng a omkei, chi in:

¹⁰Ngai in, kei demna ding ziak a mu a melma in a hon simta hi;

¹¹Ka khete kol a bunsak a, ka lampite tengteng a chiamteh hi.

¹²“Ngai in, k’on dawng ding, hiai na diklouhna ah; mihing sang in Pathian a lianzaw hi.

¹³Bangdia amah dou na hia, Ka thute a bangmah mah lah a dawng kei ding, chi in?

¹⁴Pathian in lah khatvei a gen a, ahi, nihvei, mihing in limsak kei mahleh.

¹⁵Zan a mang ah, mengmuhna ah, mite tung a ihmut kip a kiak lai in, lupna tung a ihmut laite in;

¹⁶Huailai in mite bilte a hong a, vaunate in amau a hihlau a,

¹⁷Huchi a a thiltup a kipan a mihing a lakkik a, mihing a kipan a kisaktheihna a satkhiak theihna ding in;

¹⁸Aman kawkhuk a kipan a kha a kep kik sak a, namsau a kipan a hinna.

¹⁹A lupna tung ah natna a sawi in leng a om, a guhte a kinakna om gige toh in:

²⁰Huchi in a hinna in tanghou, a kha in an lim a kih hi.

²¹Asa a tum mang a, huchi in muhtheih in a omkei; A kimulou a guhte hong dawkkhia uhi.

²²Ahi, a kha han kiang ah a hongnai a, a hinna hihsemite kiang ah.

²³A kiang a angel, kamlet, sang khat lak a khat, mihing kiang a amah adia dik bang ahia chih etsakding a om leh;

²⁴Huchi a amah ading a chingthei, Kawkhuk a paisukna a kipan amah suaktasak un, tatna ka muta,

²⁵A sa naupang a sang in nou zaw hen; a tuailai nite lam ah kik nawnta hen.

²⁶Pathian kiang ah a thum a, amah ding in deihsak theih in a om hi; huchi in nuamna toh a mai a mu a: a diktatna a kiang ah a pe nawn hi.

²⁷Mite ma ah la asa a, Ka khialta a, a dik ka na hekkawi a, thuk in ka omkei!

²⁸Kawkhuk sung a paisukna a kipan a kha a tanta hi, a hinna in vakna a muta ding hi, a chi a.

²⁹“Ngai in, hiai thilte tengteng Pathian in, mihing lak ah hih a, nihvei, ahi thumvei.

³⁰Kawkhuk a kipan a kha pikik ding in, huchi a mihing vakna ahihvak a a om theihna ding in.

³¹Chiamteh in, Aw Job, ngaikhia in: dai inla, thu ka gen ding.

³²Gen ding na neih leh, hon dawng in: Pau in, siam hon tansak ka ut ngal a.

³³Na neih kei leh, kei hon ngaikhia in: dai inla pilna k’on sinsak ding hi.”