Read Paite Chin JOB 34 Bible Online

JOB 34 - Paite Chin bible

JOB 34

¹Huailou in Elihu in a dawng a, hichi in a chi a:

²“Ka thute za un, nou mipilte; nou theihna neite, bil hondoh un.

³Dangtawng in an a chiam bang in, bil in thute a enchian hi.

⁴A dik ei ading in i tel ding uh; i lak ua hoih bang ahia i thei ding uh.

⁵Job in, Ka dik a, Pathian in ka dikna a lamang, a chi ngal a:

⁶Ka dikna huchi hitamahleh zuauthei a sim ka hi a; tatlekna bei himah leng, ka liamna hihdam theihlouh ahi.

⁷Muhsitna tui bang a dawn bei, Job bang mihing kua ahia?

⁸Thulimlou nasemmite toh a hon a pai, migiloute toh omkhawm mi.

⁹Aman lah, Pathian lak a ka kipahna ding bangmah ka lohtak kei, a chi ngal a.

¹⁰“Huaiziak in, nou theisiammite, hon ngaikhia un: Pathian in, gilou bangchi in a hih ngei dia; Thilbangkim hihthei in thulimlou bangchi in a hih mahmah dia.

¹¹Aman lah mihing thilhih amah kiang a pekik ding a, mi chiteng a lampite kiang a pekik ding ahi.

¹²Ahi, mawh khuksakna thu ah, Pathian in gilou tak in a hih kei dia, Thilbangkim hihthei in leng vaihawmna a hihse sam kei ding hi.

¹³Kuan ahia amah leitung a heutu hihna pia? Ahihkeileh khovel pumpi kuan ahia a thu a koih?

¹⁴Mihing tung a a lungtang nga a, amah lam a a kha leh a hu lakhawm;

¹⁵Sa tengteng a mangthang vek ding ua, mihing leivui a suak nawn ding hi.

¹⁶“Theihsiamna na neih leh, hiai za in: ka thu aw ngaikhia in.

¹⁷Mi thudik hua in vai a hawm ding hia? Dik leh hat amah na mawhpaih ding hia?

¹⁸Kumpipa kiang a, ‘Na hoih kei’ chih a kilawm hia? Ahihkeileh miliante kiang a, Na gilou uh? chih.

¹⁹Mi lalte mi hinna zahtak lou a, Genthei sang a mi hausate limsak zawte kiang a chih kilawm semlou ding hia? Amaute lah a khut nasep ahi ngal ua.

²⁰Mitphiat kallou in a si ua zankim lai mahmah in; mite a ling ua a pai mang ua, mihing khut hilou in mihatte lakmang in a om uhi.

²¹A mitte mihing lampite tung ah a om a, a painate a mu hi.

²²Thulimlou nasemmite bukna ding khomial hiam limliap hiam a omkei hi.

²³Vaihawmna a Pathian ma a pai ding in, mihing a ngaihtuah lailai a kiphamoh kei hi.

²⁴Lamte theihphak vuallouh in aman mi hatte a hihzan vek a, a mun uah midang a tungkhia hi.

²⁵Huaiziak in a nasepte uh a thei hi; zan in amau a lumlet a, hihsiat in a om uhi.

²⁶Midang mitmuh mahmah in migiloute bang in amau a gawt hi.

²⁷Amah zuihna a kipan a pialkhiak ua, a lampite a koimah a limsaklouh ziak un:

²⁸Huchi in genthei kahna a kiang tung ding in a bawl ua, gimthuak kahna a za hi.

²⁹Amah na pau kei leh, kuan siamlouh a tangsak dia? Aman a mai a sel leh, Amah kuan a mu thei dia? Namte kiang a hih hiam, ahihkeileh mihing kiang a hih hiam a kibang hi:

³⁰Huchi a Pathian theilou min vai a hawm louh a, a mite thang a awksak ding a omlouhna ding in.

³¹“Kuapeuh in Pathian kiang ah, Gawtna ka thuakta, ka gilou nawn kei ding,

³²Ka muhlouh nang hon sinsak in, gilou ka hihleh ka hih nawn kei ding, a chi uhia?

³³A thukna huchi a na nial na deih bang in a om diam? Kei hilou in, nang na tel ngeingei ding ahi.

³⁴Theisiammite’n ka kiang ah, Ahi, a chi ding uh, a za mipilteng in.

³⁵Job in theihna bei in thu a gen a, a thute pilna bei ahi uh.

³⁶Mihaite bang a a dawnna ah, a tawp chiang in Job tungtang ngaihtuah le uh.

³⁷Aman a khelhna ah helna a behlap a, i lak uah a khut a beng a, Pathian kalh in a thu a pungsakta hi.”