Read Paite Chin JOB 35 Bible Online

JOB 35 - Paite Chin bible

JOB 35

¹Elihu in a dawng a, hichi in a chi hi:

²“Hiai na dikna hi in na ngaihtuah hia, ahihkeileh, kei a mawng ahi, Pathian mai ah, na chi hia?

³Kei a ding in bang phattuamna a om dia? Khial lou a ka om in bang phattuamna ka nei a? na chih.

⁴Nang leh na kiang a na lawmte k’on dawng ding.

⁵Vante lam en inla, mu in; vante, nang sang a sangzaw, en in.

⁶Na hihkhelh leh, amah dem a bang hih na hia? Na tatleknate punsak hileh, amah tung a bang hih na hia?

⁷Diktat hile chin, amah bang na pia a? Ahihkeileh na khut a kipan bang a mu a?

⁸Na gitlouhna in nang bang in mi a hihna thei a; na diktatna in mihing tapa a hih hampha thei hi.

⁹“Nuaisiahna tam mahmah ziak in a kikou khia ua; mi hat ban ziak in panpih deih in a kikou uh.

¹⁰Kuamah in, Zan chia late honpia, Pathian kei hon Bawlpa koi a om ahia;

¹¹Lei a gamsate sang a hon sinsak tamzaw leh, van a vasate sang a hon pilsakzaw? a chi kei uh.

¹²Huai ah a kikou ua, himahleh, migilou kisaktheihna ziak in, kuamah in dawnna a pe kei uh.

¹³Chihtaktak in Pathian in bangmahlou a za kei dia, Thilbangkim hihthei in leng a limsak sak kei ding hi.

¹⁴Nang ngial houh: Amah ka mu kei, a thu ma ah a om, Amah ka ngak hi, na chih vial.

¹⁵Himahleh tuin, heh a a veh louh a, kiotsakna leng a limsaklouh ziak in;

¹⁶Huaiziak in Job in bangmahlou in a kam a ka ahi; theihna bei in thu a tamsak ahi.”