Read Paite Chin JOB 36 Bible Online

JOB 36 - Paite Chin bible

JOB 36

¹Elihu mah in a gen zel a, hichi in a chi hi:

²“Hon na thuakzou zek inla, huan k’on ensak ding; Pathian sik in lah banghiam khat gen ding ka nei ngal a.

³Gamla a kipan ka theihna k’on la ding a, kei hon Bawlpa tung ah diktatna ka nga ding hi.

⁴Diktakin ka thute zuau ahi kei a: hoihkim khat ka kiang ah a om hi.

⁵“Ngai in, Pathian in thil a hihthei a, kuamah a musit kei: theihsiamna hatna ah thil a hihthei hi.

⁶Gilou hinna a hawi kei a: himahleh gimthuakte kiang ah a dikna uh a pia hi.

⁷Mi diktat a kipan a mit a la kik kei a: himahleh mangtutphah tung a kumpipa toh amau tangtawn in a koih a, huchi in hihlet in a om uhi.

⁸Huan sikkhaute a gak a a om ua, gimthuakna guite a lak a a om uleh;

⁹Huchi in a thilhih uh amau a ensak a, a tatlekna uh, huchi a kisatheitak a a na omna uh.

¹⁰Thuhilhna lam ah a bil uh a honsaka, thulimlouhna a kipan kik din thu a pia hi.

¹¹Amah thu a ngaihkhiak ua, a na a sep uh leh, a nite uh hauhsakna in a hihbei ding ua, a kumte uh kipahna in.

¹²Himahleh a ngaihkhiak kei ua leh, namsau in a mangthang ding ua, huchi in theihna bei in a si ding uh.

¹³“Himahleh amau lungtang a Pathian limsaklouhnate’n hehna a khol khawm hi: amau a henlai in panpih deih in a kikou kei uh.

¹⁴Tuailai in a si ua, siangloute lak ah a hinna uh a mangthang hi.

¹⁵A gimthuakna in gimthuakte a suaktasak a, nuaisiah na ah a bil uh a honsak hi.

¹⁶Ahi, gakchihna omlouhna, mun lian lam ah dahna a kipan nang a hon pimang ding a; na dohkan tung a kilui thauna in a dimta ding hi.

¹⁷“Himahleh giloute vaihawmna in na dim a: vaihawmna leh diktatna in nang honlen hi.

¹⁸Thangpaihna a om ziak in, pilvang in huchilou in zaw na hauhna in nang a hon pimang kha ding hi; golhgukna tampi in leng nang hon pialsak kei hen.

¹⁹Dahna a na om louhna ding in, na hauhsaknate a hun diam, ahihkeileh na hatna thilhihtheihna tengteng?

²⁰Mite tengteng a mun ua satkhiak a a om zan uah lunggulh ken.

²¹Pilvang in, gilou limsak ken: gimthuakna sang in hiai lah na telta hi.

²²Ngai in, Pathian in a thilhihtheihna in sangtak in a hih: amah bang sinsakmi kua ahia?

²³Kuan amah a lampi thu a pia a? Ahihkeileh, Diklouhna na bawlta, kua’n a chi thei dia?

²⁴“Mite’n la a sak uh, a thilhih hihlian ding in theigige in.

²⁵Huai ah mite tengteng a en ua; huai mihing in gamlapi ah a mu hi.

²⁶Ngai in, Pathian a lian a, amah i theikei: a kumte zah zontheih ahi kei.

²⁷Tui takte aman a tawikhin a, huai a tuihu a kipan vuah a zu:

²⁸Huai vante’n a sungkhia ua, mihing tung ah tampi in a tak.

²⁹Meipi kiphahte leh a inn vanpi gingte kua’n a theisiam dia?

³⁰Ngai in, a kim ah a khovak a zak a: tuipi nuai a tuam hi.

³¹Hiaite in mite a vaihawmsak a; an tampi a pia hi.

³²A khutte in khophia a tawi a; chiamtehna khoh din thu a pia hi.

³³Huai husa in a tungtang thu a gen a, ganhonte’n leng hong kuantou huihpi tungtang thu a thei uh.”