Read Paite Chin JOB 37 Bible Online

JOB 37 - Paite Chin bible

JOB 37

¹“Hiai ah leng ka lungtang a ling a, a mun a kipan suan in a om hi.

²A aw ging leh a kam a kipan a vanging paikhia noute’n ngaikhia un.

³Van pumpi nuai ah a sawlkhia a, a khophia lei tawpnate tan in.

⁴Huaizoh in aw a kikou a; a lalna aw in vanpi a gingsak a: a aw zak a a om chiang in amau a len kei hi.

⁵Pathian in a aw in lamdangtak in vanpi a gingsak a; i theihtheih louh, thil thupite a hih zel hi.

⁶Aman lah vuk kiang ah, Lei ah kia in, a chi ngal a; huchi mah bang in vuahmal phin kiang ah leng.

⁷Mi chiteng khut a tuambit a; a bawlsa mite tengteng in huai a theihtheihna ding un.

⁸Huailai in gamsate a mun uah a lut ua, a kuate uah a om uhi.

⁹Simlam dantan a kipan huihpi a hong a: mallam a kipan khovot.

¹⁰Pathian hu in tuikhal piak ahi: tuite nakna hihhaksat in a om.

¹¹Ahi, meipi nawnna a pawsak a; a khophia meipi a phalhsak hi:

¹²Amah pi in a kivial heihei ua, ten theihna khovel maikaih a amaute thu a piak peuhmah a hihna ding un:

¹³Bawlhoihna ding hiam, a gam ading hiam, ahihkeileh chitna ding hiam a, a hon paisakna ah.

¹⁴“Hiai ngaikhia in, Aw Job: Ding kinken inla, Pathian thilhih lamdangte ngaihtuah in.

¹⁵Amaute tung a Pathian thupiak a koih a, a meipi khophia a tansak dan na thei hia?

¹⁶Meipite kibuk diknate, amah theihna hoihkim thilhih lamdangte na thei hia?

¹⁷Sim huih ziak a lei a daih sipsip lai a, na puansilhte a lum dan?

¹⁸Amah toh van, suntawm limlang bang a khauh na phalh thei hia?

¹⁹A kiang a ka gen ding uh hon sinsak in; mialna ziak in ka thugen ding uh ka gelkhol theikei ua.

²⁰Thu ka gen ding chih amah hilh ding a diam? Ahihkeileh mihing in valh khit a om ut ding a diam?

²¹Huchi in mite’n meipi a om khovak a mu kei ua: himahleh huih a nung a, amaute a hihsiang hi.

²²Mal a kipan in dangkaeng bang a thupi a hongpai a: Pathian a lalna ah a thupi hi.

²³Thilbangkim hihthei thu ahihleh, mu theikei hang: thilhihtheihna ah a thupi pet mah hi: Huan vaihawmna leh dikna hauhna ah gim a thuaksak kei ding hi.

²⁴Huaiziak in mite’n amah a lau ua: lungtang a pil kuamah a limsak kei hi.”