Read Paite Chin JOB 38 Bible Online

JOB 38 - Paite Chin bible

JOB 38

¹Huchi in pingpei a kipan in “ Job a dawng a, hichi in a chi hi:

²Theihna bei thute a thuhilh hihmial hiai kua ahia?

³Kipasal sak in tuin na kawng gak in; hon dong ding ka hi, ka kiang a na gen ding ahi.

⁴“Lei kingaknate ka koih lai in nang koi ah na om a? Phuang in, theihsiamna nei na hihleh.

⁵A tehnate kua bawl ahia? Thei na hihleh! A tung a tehna khau kua zan ahia?

⁶A nuai suangphumte kua phum ahia? Huai a ning a suang kua koih ahia?

⁷Zingsang aksite’n la a sak khawm ua, Pathian tapate tengteng kipak a a kikou lai un?

⁸“Ahihkeileh kuan kongkhakte in tuipite a khak bing a? Gil a kipan hong pawtkhia bang a, a hong puahkhiak lai in.

⁹Huai a puansilh meipi leh, khomial bikbek, huai ading a tuamna puan ka bawl a,

¹⁰Huai ading a ka thupiak bawl a, kalhnate leh kongkhakte koih a,

¹¹Hiai tan na hongpai ding, himahleh a ban hilou in, ka chih a; hiai lai ah a kiuangsak na tuikihotte kholsak in a om ding uh, ka chih lai in?

¹²“Na nite a kipat nungsiah zingsang thu na pia in, phalvak a mun thei din na bawlta hia;

¹³Lei tawpnate a mat theih a, huai a kipan a gilou sinkhiak a hihtheihna ding in?

¹⁴Chiamtehna nuai a tungman leibang in mel a kikheng a; puansilh bang in thil tengteng zenei in ading khia hi:

¹⁵Gilou a kipan a a khovak uh lettang sak ahi a, a ban liksang uh a kitan hi.

¹⁶“Tuipi nak sung ah na lutta hia? Ahihkeileh tuithuk tawp ah na paita hia?

¹⁷Sihna kongpite na kiang ah taklat in a omta hia? Ahihkeileh sihna limliap kongpite na muta hia?

¹⁸Lei zatdan na thei siamta hia? Phuang in, huai na theih leh.

¹⁹“Khovak tenna zotna lampi koi ah a om a, huan khomial omna mun koisan ahia?

²⁰Huchi a gamgi tan a na tonpih theih a, huai a inn tan a lampite na theihna ding in?

²¹Thei mah niteh maw, huailai a piangta hi ding chin a? Na nite tamdan a thupi mahmah hi!

²²“Vuk koihkhawmna ah na lut ngei hiam, ahihkeileh gial koihkawm na muta hia?

²³Huai buaina hun a ding leh kidou leh kisat ni adia ka koihkholhte?

²⁴Bang lampi ah ahia khovak a kikhen hiam leitung a suahlam huih a dalhzak?

²⁵“Kuan ahia tui tampi luanna ding a tuilam khuak a, kekkia adia lampi sial?

²⁶Mihing om louhna mun gam tung a vuah zusak ding in; mihing om louhna, gamdai tung ah;

²⁷Lei kisia leh segawpsa lungkimsak ding; loupa hing nou khang khesak ding?

²⁸“Vuah in pa a nei hia? Ahihkeileh daitui takte kua suan ahia?

²⁹Kua gil a kipan a tuikhal hongpai ahia? Van daituikhal ngou, kua suahsak ahia?

³⁰Suang bang in tuite a tak a, tuithuk maite a khal hi.

³¹“Siguk khaute na khihkhawm thei hia? zuheisuktun khaute na phel thei hia?

³²Amah hunbi ah Aksi lamvak a chiamtehnate na pikhe thei hia? Ahihleh Jangkhua leh tate na pi thei hia?

³³Van thusehte na thei hia? Huai lalna lei ah na ding khesak thei diam?

³⁴“Nang tui tampi in a khuh theihna ding in meipi kiang ah aw na suah thei diam?

³⁵A pai theihna ding un khophiate na sawl khe thei hia?

³⁶Sunggil lam ah pilna kuan a koih a? Ahihkeileh lungsim kiang ah kuan theihsiamna a pia a?

³⁷Pilna in kua’n meipite a sim thei dia? Van tuithawlte kuan a bawkhe thei dia?

³⁸A lompi a leivui a luan a, a sakte a kimat khawm ngiungeu lai un?

³⁹“Humpinelkai ading in samat na betsak ding hia? Ahihkeileh humpinelkai noute gilkial na hihdam ding hia?

⁴⁰A kua ua a boh ua, buk ding a a bukna mun ua a om nilouh lai un?

⁴¹Va-ak ading a an kuan a pia a? A noute Pathian kiang a kikou a An duh man a a vakvak lai un?”