Read Paite Chin JOB 39 Bible Online

JOB 39 - Paite Chin bible

JOB 39

¹“Suangpi a gam sathakte’n nou a suahsak hun uh na thei hia? Ahihkeileh nou a neih lai uh na chiamteh thei hia?

²A kha chinsak zah uh na thei hia? Ahihkeileh a pian hun na thei hia?

³A kun ua, a tate uh a suang uh, a lungkhamnate uh a paikhia uhi.

⁴A tate uh deihhuai tak in a om ua, gamlak ah a khang lian ua; a kuan khia ua, a hong kiknawn kei uh.

⁵“Kua’n gam sabiltung a khah khia a? Ahihkeileh kuan gam sabiltunghonte a phel a?

⁶Loupa gam a inn ka bawl a, huan chi gam a tenna mun in;

⁷Khopi buai nuanua a musit a, Hawltute kikounate a za kei hi.

⁸Mual dungte a gantatna mun ahi a, huan thilhing chiteng a zong hi.

⁹“Na nna sem ding in gam bawngtal a lungkim diam? Ahihkeileh na anpiakna kiang ah a om gige diam?

¹⁰Leilehna ah khau in gam bawngtal na khih thei diam? Ahihkeileh nanung ah guamte a toktam diam?

¹¹A hatna a thupi ziak in, amah na muang diam? Ahihkeileh a kiang ah na sepgimna na khiak diam?

¹²Na buhchi inn a hontut a, na buhphual a buh a kaihkhawm theihna ding in amah na muang diam?

¹³“Ostrik kha kisathei tak in a kizap a; a khavengte leh a multe a migi hia?

¹⁴A tuite lah leitung ah a nusia a, leivui ah a lumsak a,

¹⁵Khe in a sikkham thei chih a mangngilh a, ahihkeileh gamsa in a sikgawp thei chih.

¹⁶Amah a hilou bang in, a noute siatna ding in a khauh a: a sep gimna bangmahlou himahleh, a lau kei hi:

¹⁷Pathian in pilna a ngawlhsak ziak in, theihsiamna leng a pe sam kei hi.

¹⁸Tungsang lam a a ki tawisang chiang in, sakol leh a tungtuangmi a nuihsan.

¹⁹“Sakol a hatna na piak hia? Mul nem in a ngawng na tuam hia?

²⁰Khaukhup bang in na tawmsak hia? A hamna thupi a lauhuai ve.

²¹Guam ah lei a tuan a, a hatna ah a kipak a, mi kigalvante tuak ding in a paikhia.

²²Lauhuai a nuihsana, a lungdong kei a, namsau leng a nungngat sam kei hi.

²³Amah ah thalbawm a ging lengleng a, teipi te zelzel leh chiangzum.

²⁴Kihtakhuaina leh hehna in lei a nawmvalh a; Pengkul aw ahi chih leng a um sam kei hi.

²⁵Pengkul a gin teng in, Hah; a chi a, kidouna, heutute vanpiging leh kikou, gamlapi apan a thei.

²⁶“Na pilna in mu sangpi a lengsak in, a khate simlam ah a phalh hia?

²⁷Nang thupiak in muvanlai a tunglen in tungsang ah a bu a sep hia?

²⁸Suangpi tung ah a teng a, huai ah giahna a nei a, suanghengte leh kulh muanhuaite ah.

²⁹Huai a kipan in matding a mu a; a mitte’n gamla a mu hi.

³⁰A noute’n leng sisan a tawpbei ua: thah a omna mun, huai ah a om hi.”