Read Paite Chin JOB 4 Bible Online

JOB 4 - Paite Chin bible

JOB 4

¹Huailai in Eliphaz, Teman mi in a dawng a, hichi in a chi hi:

²“Min nang hon houlimpih tum leh na zadah diam? Hizongleh paulou in kua a omthei dia?

³Ngai in, mi tampi na hilhta a, khut hatloute na hihhatta hi.

⁴A puklai in na thute’n a dingsak a, khuk hatloute na kipsak hi.

⁵Himahleh tun na tung ah a hongtung a, na bah a; nang a honkhoih a, na buaita hi.

⁶Pathian na kihtakna, na muanna hilou hia, na lametna na lampite muanhuaina?

⁷“Theigige in, k’on ngen hi, hoih hinapi a, mangthang ngei kua ahia? Ahihkeileh koilai ah ahia midik satkhiak a a om?

⁸Kei muh in, thulimlouhna leilette ahi ua, buaina tuh a huai mah atte.

⁹Pathian hu in a mangthang ua, hehna a mut a hihman in a om uhi.

¹⁰Humpinelkai huham leh, humpinelkai hangsan aw leh, humpinelkai tuailai hate, a kitanta hi.

¹¹Samat taksap ziak in humpinelkai tek a mangthang a, huan humpinelkaipi noute a dalhzak uhi.

¹²“Tuin a guk in thil ka kiang a hongtung ka bil in huai a huauna a sangta hi.

¹³Zan mengmuhna a kipan a ngaihtuahnate ah, mite nakpitak a a ihmut san lai un,

¹⁴Launa ka tung ah a hontung a, linna in ka guhte tengteng a sing hi.

¹⁵Huailai in ka mai ah kha a pai a; ka chimul a dingta hi.

¹⁶Ka ding kinken a, himahleh huai a kilatdan ka theikak theita kei a; a lim tuh ka mit ma ah a om a; daihna a om a, aw ka za hi,

¹⁷Pathian sang in sithei mihing a dikzaw ding hia? A Bawlpa sang in mihing siangthou zaw ding hia? chi in.

¹⁸Ngai in, a sikhate ah muanna a koihkei a; angelte hai in a ngoh hi:

¹⁹Tungman inn a teng amaute hi sem na un chia, a suangphum leivui a om a, leikha ma a chimsia:

²⁰Zingsang leh nitak kikal in hihsiat in a om ua: theihlouh hial in tangtawn in a mangthang uhi.

²¹Amau sung a puanin khau uh a bohkhiak touh hilou hia? Pilna tellou in a si uhi.”