Read Paite Chin JOB 41 Bible Online

JOB 41 - Paite Chin bible

JOB 41

¹“Ngakuai in Ole na kai khe thei diam? Ahihkeileh a khau in a lei na sawntum thei diam?

²A nak sung ah khauhual na thun thei diam? Ahihkeileh sikkawi in a haizek na vut pailet thei diam?

³Na kiang ah thil nget tampi a bawl diam? Ahihkeileh na kiang ah thu nemte a gen diam?

⁴Tangtawn a ding in amah sikha dia na lak theihna ding in, nang toh thukhun a bawl diam?

⁵Vasa toh bang in amah toh na mawl diam? Ahihkeileh na sikhanute ading in amah na hen diam?

⁶Ngamanmite’n amah sumsinna ding in a bawl ding uam? Sumsinmite lak ah amah a zuak ding uam?

⁷Siklen in a vun na dimsak thei diam, ahihkeileh a lu ngalingte in?

⁸A tung ah na khut koih in; kidouna theigige in, huchi in na hih nawn kei ding hi.

⁹Ngai in, amah lametna bangmahlou ahi: amah muh mahmah in mi paihkhiak in a omkei dia hia?

¹⁰Amah hihhalh ngam khop ding in kuamah a hang kei: ka ma ading kua ahia leh?

¹¹Amah ka dit ding, ka kiang ah kuan a pe masa a leh? Van nuai a om peuhmah kei a ahi.

¹²“A guhlehtang thu ah ka dai kei ding, a hatna mahmah leh, a pum kilawmna ah leng.

¹³A puansilh tungnung kuan a suahsak thei dia? A kamkaih thuah nih sung ah kua hongpai dia?

¹⁴A mai kongkhakte kuan a hong thei dia? A ha kimvel ah lauhuaina a om.

¹⁵A lip hattakte a kisaktheihna ahi, Namkipsa bang in khakkhum ahi.

¹⁶A kal ua huihzam a lut theihlouhna ding in, khat in a dang a naih mahmah.

¹⁷Khat leh a dang a kizom ua, a kisoumat ua, khentheihlouh in a om uh.

¹⁸A hahchhiaute’n a vaksak a, a mitte zingsang mitvunte bang ahi.

¹⁹A kam apan meikuangte a pawtkhia, meiekte a tawm khia hi.

²⁰A nakvangte a kipan in meikhu a pawt a, halsiangna bel leh chiklak loupa kang a kipan bang in.

²¹A hu in suang a kuangsak a, a kam apan meikuang a pawtkhia hi.

²²A ngawng ah hatna a om gige a, a ma ah lauhuaina a lam hi.

²³Asa thate a kizom khawm ua: a tung ah a kip ua; hihtat theih in a omkei uh.

²⁴A lungtang suang bang in a kip a; ahi, buhgawina suang nuainung bang ahi.

²⁵Amah a thoh chiang in, mihatte a lau uh: lauluatna ziak in omdan ding a theikei uh.

²⁶Min amah namsau in sat leh, a phatuam kei hi; teipi leng, thal leng, sikmuk zum leng.

²⁷Buhpawl bang in sik a sim a, sing muatsa bang in dal.

²⁸Thal in amah a taisak theikei ding: amah lak ah vaisuanglot suangte buhpawl a suak hi.

²⁹Khetbukte buhpawl bang a sim ahi: Teipi ging a nuihsan hi.

³⁰A nuai lampangte belpei ahi: buannawi tung ah buh khetna chiang bang in a kiphah.

³¹Tuithuk belsou di’n a bawl a: tuipi nuhtheih bawm in a bawl hi.

³²A nung ah lampi a vaksak a; tuithuk samkang nei a sa uhi.

³³Leitung ah amah bang a lau neilou omkei a,

³⁴Thil sang chiteng a en a: kisathei tapate tengteng tung ah kumpipa ahi.”