Read Paite Chin JOB 42 Bible Online

JOB 42 - Paite Chin bible

JOB 42

¹Job in TOUPA a dawng a, hichi in a chi hi:

²“Thil bangkim na hihthei chih leh nang thiltup kham theih ahi kei chih ka thei hi.

³Hiai thuhilhna theihna tellou a sel kua ahia? Huaiziak in ka theihsiamlouh, ka theihlouh, kei adia thillamdang luate ka genkhia hi.

⁴Za in, k’on ngen hi, ka pau ding; nang k’on phut ding, kei lam ah nang phuang in, n’on chi hi.

⁵Ka bil zakna in nang k’on za a; himahleh tuin ka mit in k’on mu a,

⁶Huaiziak in ka kikih a, leivui leh meivu ah ka kisik hi.”

⁷Huan hichi ahi a, huchi a TOUPA’N Job kiang a hiai thute a gen khit in, TOUPA’N Eliphaz, Teman mi kiang ah, Ka hehna nang tung leh, na lawm nihte tung ah a kuang, ka sikha Job bang a noute’n ka tanchin thildik na gen louh ziak un, a chi hi.

⁸Huaiziak in tuin, bawngtal sagih leh belamtal sagih la unla ka sikha Job kiang ah hoh unla, nou ading in haltum thillat lan un; huchi in ka sikha Job nou ading in a thum ding a; amah vang in ka sang dia, huchi in na haina uh dungzui in na tung uah ka hih kei ding; ka sikha Job bang in lah ka tanchin thildik na gen kei uhi, chi in.

⁹Huchi in Eliphaz, Teman mi leh Bildad, Suah mi leh Zophar, Naamathmi a kuanta ua, TOUPA’N thu a piak bang in a hihta uhi: TOUPA’N Job a sangta hi.

¹⁰Job a lawmte adia a thumzoh in TOUPA’N Job saltanna a kiheisak a: TOUPA’N Job a ma a neih zahnih a peta hi.

¹¹Huailai in a kiang ah, a unaute tengteng leh, a sanggamnute tengteng leh, tuma lam in a meltheih hisa tengteng leh, a insung a tanghou amah toh nete a hongpai ua: amah a nem ua, a tung a TOUPA’N hoihlou a tunsak tengteng tungtang thu ah amah a lungmuan uhi: michih in leng amah sum nengneng leh, michih in dangkaeng zungbuh a pia uhi.

¹²Huchi in TOUPA’N Job tawpna lam a kipatna lam sang in a nak vualzawl zaw a: belam sang sawmlehli, leh sangawngsau sang guk leh bawngtal sang khat leh, sabengtungnu sang khat a nei hi.

¹³Tapa sagih leh tanu thum leng a nei hi.

¹⁴A masapen, Jemima a chi a; a nihna min, Kezia; a thumna min, Keren happuk.

¹⁵Huchi in gamsung pumpi ah Job tanute bang a melhoih a omkei uhi: a pa un a unaute lak ah goutan amau a pia hi.

¹⁶Huai nung in Job bel kum za leh sawmli a dam a, a tapate, leh a tapate’ tapate, khang lina tan a mu hi.

¹⁷Huchi in, Job a tek mahmah a, a Upat tak ziak in a sita hi.