Read Paite Chin JOB 5 Bible Online

JOB 5 - Paite Chin bible

JOB 5

¹“Tun sam in; nang hon dawng kua a om a? Misiangthoute lak ah a kua lam na nga dia?

²Lungzinna in lah mihai a that a, huan thikna in mi mawl a that sek hi.

³Mihai zungkai ka muta a; himahleh thakhat in a tenna ka hamsiat hi.

⁴A tate bitna a kipan gamlapi ah a om ua, kongpi ah hihgawp in a om uh, kuamah amaute hunkhe ding a omkei uhi.

⁵A gilkial in linglak a kipan nasan a an kaihkhawm a gaihsak a, suamhat in a neih leh lam a nawmvalh sak hi.

⁶Gimthuakna leivui a kipan in a hongpawt kei a, lei a kipan in buaina leng a hong dawnkhe sam kei hi;

⁷Himahleh mihing buai ding mah a piang ahi, mei ekte a tou len bang in.

⁸“Himahleh ken ahihleh, Pathian lam ah ka zong ding a, Pathian kiang ah ka thu ka koih ding hi.

⁹Thil thupite hihpa leh zonkhiak theihlouh; simzohlouh thillamdangte:

¹⁰Leitung a vuah pepa leh, loute tung a tui sawlpa:

¹¹Huchi in aman a niamsate tungsang ah a koihtou a; misi sunte muanna ah a tawisang hi.

¹²Zekhemhatte lunggelte bangmahlou a suaksak a, huchi in a khutte un a thiltup uh a hih theikei uhi.

¹³Mipilte a zekhemhatna un a man a: mi hoihloute thilgel a thal paihsak hi.

¹⁴Sunlai in khomialna a thuak ua, Zanlai bang in suntang lai in a mai maimah uhi.

¹⁵Himahleh aman gentheite mi hatte kam leh khut a kipan leh tasamte mahmah namsau a kipan a hondam hi.

¹⁶Huchi in genthei in lametna a nei a, thulimlouhna in a kam a humsak hi.

¹⁷“Ngai in, Pathian in a bawlhoih min nuam a sa hi; huaiziak in bangkim hihthei sawina musit ken.

¹⁸Aman lah meima a bawl a, a tuam a: a liamsak a, a khut in a damsak hi.

¹⁹Buaina guk ah a hon suaktasak ding a; Ahi, sagih ah gilou in nang a hon khoih kei ding hi.

²⁰Kial chiang in nang sihna a kipan a hontan ding; namsau thilhihtheihna a kipan, kidou chiang in.

²¹Kamsung a leizepna a kipan honsel ding a; siatna a hongtun chiang in na lau sam kei ding hi.

²²Siatna leh kialna ah na nui ding a, lei gamsate na kihta kei ding hi.

²³Gam a suangte toh na kithuahtheih ding ziak un; huan gam a gamsate nang toh na kituak ding uhi.

²⁴Na puanin muang in a om chih na thei ding a; na ganhuang na veh ding a, bangmah kimlou a omkei ding hi.

²⁵Na chite leng a thupi ding a, na suante lei a loupa bang in a om ding uh chih na thei ding hi.

²⁶Kum ching in na han na zuan ding a, a hun a buhlak a om bang in.

²⁷Ngai in, hiai thu i zongta ua, a dikmah ahi, za in na hoihna ding in thei in.”