Read Paite Chin JOB 6 Bible Online

JOB 6 - Paite Chin bible

JOB 6

¹Huchi in Job in a dawng a, hichi in a chi hi:

²“Aw ka lungzinna kibuk thei hi henla, ka tuahsiatna selbukna ah ki koihkhawm thei hileh:

³Tun tuipite a piaunel sang in a gikzaw ding: huaiziak in ka thugente leng a khauh hi.

⁴Thilbangkim hihthei thalte lah ka sung ah a om ngal a, gu huai a kipan a ka kha in a dawnvek: Pathian mulkimhuainate kei dou din a kivual uhi.

⁵Loupa a nekding mu gam sabiltung a ham ahia? Ahihkeileh gan an mu bawngtal a ham ahia?

⁶Gim neilou chi tellou in a kine thei dia hia? Ahihkeileh aktuida ah limna mawngmawng a om hia?

⁷Ka kha in amaute a khoih nuam kei; kei ding in an kihhuai bang ahi uhi.

⁸“Aw ka nget tang theileng zaw; ka thil deih Pathian in hon phal lezaw:

⁹Kei hon hihgawp ding in Pathian deihlam hilai henla; a khutzan in, kei hon satkhe mai leh:

¹⁰Huchi in lungmuanna ka neilai dia; ahi, damlou natna ah ka kipak ding: Misiangthoute thu ka kitheihmohbawl ngal kei hi.

¹¹Ka hatna bang ahia, ka ngak ding? Huan ka beina bang ahia, ka kuhkal ding?

¹²Ka hatna suangte hatna hi hia? Ahihkeileh ka sa dalsik hia?

¹³Kei ah panpihna a om hetkei a, kei a kipan theihsiamna hawlmang in.

¹⁴“Bah dia mansa a om kiang ah a lawm in siamna a etsak ding ahi kei maw; huchilou in Bangkim hihthei kihtakna tawpsan ahi kei ding maw.

¹⁵Luita bang in ka unaute a lepchiah uh; luita mangthang luanna bang in.

¹⁶Huai tuikhal in a vom a; huai ah vuk a kisel.

¹⁷A lum hun chiang in a tuimang ua, a sat chiang in a mun ua kipan a mangthang uhi.

¹⁸Huai lampi a khualzinte a pial ua, bangmah omlouhna mun ah a paitou ua, a mangthang uh.

¹⁹Tema khualzinte’n a zong ua, Sheba pawlte’n a lamen uh.

²⁰A kilamet hang un a zahlak uh; huai lam ah a vapai ua a zahlak uh.

²¹Tuin bangmah na hi ngal kei ua; mulkimhuaina na mu ua, na lau uhi.

²²Kei honpia un? Ahihkeileh na neih leh lam ua kipan in kei ading in thilpiak lan un, ka chi hia?

²³Ahihkeileh, melma khut apan hontan un, mi hat khut apan hon hukhia un ka chi hia?

²⁴“Hon sinsak in, huan ka dai ding: ka diklouhna hon theisiam sak un.

²⁵Thudikna thute hat hinah e: himahleh miselna in bang a selphou a?

²⁶Thute selphou ding a um na hi uhia? Chimawhmi thugente huih bang ahi chih thei in.

²⁷Ahi, paneiloute tung ah ai na san ua, na lawm uh sumsinna van in na bawl uh.

²⁸“Tuin hehpih in hon en un; na ma uah thuzuau ka gen kei a.

²⁹Kiknawn un ka hon ngen ahi, diklouhna omkei hen; ahi, kiknawn un, ka thu a dik ahi.

³⁰Ka lei ah diklouhna a om hia? Thil hoihlou ka lei in a theikak theikei dia hia?