Read Paite Chin JOB 7 Bible Online

JOB 7 - Paite Chin bible

JOB 7

¹“Leitung ah mihing adin kidouna a omkei maw? A nite kilohmi nite bang ahi ka hia?

²Lim deih mahmah sikha bang in, a loh lamen kilohmi bang in:

³Huai bang in bangmahlou khate nei ding a bawl ka hi, huan kei ading in zan chimhuaite seh ahi.

⁴Ka lup chiang in, chikchiang in ka thou dia? ka chi a; himahleh zan a sawt hi; lehlam lehlam ah nisuah matan kilumlet in ka om hi.

⁵Ka sa than leh leivui khal in a tuam a; ka vun kimat in a puakkham hi.

⁶Ka nite siamganmi khohthei sang in a kin zaw a, lametna bei a zatbei ahi.

⁷“Aw ka hinna huih ahi chih theigige in: ka mit in hoih a mu nawn kei ding hi.

⁸Kei honmu mit in hon en thei nawn takei ding a; na mitte ka tung ah a om ding ua himahleh ka omta kei ding hi.

⁹Meipi mangthang a omtak louh bang in, huchi in kuapeuh Sheol a paisuk a hong paitou nawnta kei uhi.

¹⁰A inn ah a kiknawn kei ding a, a mun in amah a thei nawn kei ding hi.

¹¹Huaiziak in ka kam ka khou kei ding a; ka lungsim gimna ah thu ka gen ding; ka kha haksatna ah ka phun ding hi.

¹²Tuipi ka hi hia, ahihkeileh tua Tuipi ngapilian ka hi ahia, huchi a kei n’on chinnak?

¹³Ka lupna in hon lungmuan ding a, ka tutna nem in ka phunna a zangkhai sak ding, ka chih chiang in;

¹⁴Huaichiang in mang in n’on lausak a, mengmuhna in n’on mulkimsak hi:

¹⁵Huchi in ka kha in heklup leh sihna a tel a, hiai ka guhte sang in.

¹⁶Ka hinna ka chimtak a; ka hing gige kei ding: hon omsak maimai un; ka nite lah bangmahlou ahi ngal a.

¹⁷Mihing bang ahia, hichitel a na pahtawi ding a, amah tung a na lungtang na koih ding?

¹⁸Zingsang teng a amah na veh a, mitphiatkal chih a amah na ettel ding?

¹⁹Bang tan vei kei hon lehngatsan louding na hia, bang tanvei ka chil ka nawmvalh matan hon omsak maimai louding na hia?

²⁰Na khial hita leng, na tung ah bang ka hih a, Aw mite chingpa nang? Bangdia nang adia chiamtehna bang a hon koih na hia, huchi a keimah adia puakgik ka hih maimah?

²¹Bangdia ka tatlekna ngaidam lou a, ka thulimlouhna lamang lou oi? Kei tuin leivui a lum ding ka hi a; kuhkaltak in na honzong dia, himahleh ka omta kei ding hi.”