Read Paite Chin JOB 8 Bible Online

JOB 8 - Paite Chin bible

JOB 8

¹Huchi in Bildad Sua min a dawng a, hichi in a chi hi:

²“Bang tan hiai thilte gen ding na hia? Bang tan na kam a thute huih hat bang ding ahi ua?

³Pathian in vaihawmna a hekkawi ahia? Ahihkeileh Thilbangkim hihthei in dikna a hekkawi ahia?

⁴Na tate a tung ah a khial ua, huai tatlekna ziak a a khut a amaute a pikhiak leh:

⁵Pathian lam kuhkaltak a na zon a, huai Thilbangkim hihthei kiang a na thilnget na bawl leh;

⁶Na siangthou a na dik leh; nang ziak in tuin ka khanglou dia, na diktatna omna a lohching sak ding hi.

⁷Na kipatna neu mahleh, na tawpna nanung lam nakpi’n a thupi ding hi.

⁸“Huaiziak in k’on ngen hi, hun masa thu kan inla, a pipute un a na zonkhiak uh lam ah kisuk in:

⁹Ei lah zan a lel i hi ua, bangmah i theikei uh, leitung ah i nite uh lah limliap ahi a:

¹⁰Amaute’n nang a hon sinsak un, a honhilh un, a lungtang ua kipan in thute a gen kei ding ua hia?

¹¹“Buannawi lou in phaiphek a khangkhe thei ahia? Tui lou in loupa a khangthei ahia?

¹²Hing a om a, satpuk louh a hihlai in, loupa dangte ma in a vuainak hi.

¹³Huai bangmah in Pathian mangngilhte tengteng lampi ahi; pathian limsaklou mi lametna a mangthang ding:

¹⁴A muanna a kitam ding a, a kingakna maimomlen ahi hi.

¹⁵A inn tung ah a kingai dia, himahleh ading kei ding: huai ah a len chinten dia, himahleh a pangsawt kei ding hi.

¹⁶Nisuah ma in a hing a, a huan ah a selte a mengkhia uhi.

¹⁷A zungte leivum kim ah a zam ua, suangte omna mun ah a hing hi.

¹⁸A mun a kipan lakmang hileh, huchi in amah a kitheihmohbawl ding a, Ka honmu ngeikei, chi in.

¹⁹Ngai in, hiai a lampi kipahna ahi a, lei a kipan a dangte a hongsuak ding uh.

²⁰“Ngai in, Pathian in mi hoihkim a paikhe kei ding, gilou hihmite leng a tungding sam kei ding hi.

²¹Na kam nuih in a hon dimsak lai dia, na mukte kikouna in.

²²Hon mudahte zumna in a khuh ding a; gilou puanin a omta kei ding hi.”